zulm ki har taraf tirgi dekh li

zulm kī har taraf tīrgī dekh lī

'ilm phailā jahāñ raushnī dekh lī

naaz naḳhre adā sādgī dekh lī

phuul banñe se pahle kalī dekh lī

tum mile aur mil kar bichhaḌ bhī ga.e

is bahāne magar zindagī dekh lī

mushkiloñ meñ jo khote nahīñ hausla

aise logoñ kī zinda-dilī dekh lī

'aib-jūī se pahle ye socho kabhī

tum ne kyā apnī har ik kamī dekh lī

ek qatra bhī miltā nahīñ pyaas meñ

ham ne dariyā kī dariyā-dilī dekh lī

chand sikkoñ kī ḳhātir jo beche anā

saarī duniyā ne us kī ḳhudī dekh lī

be-ḳhatā ko yahāñ ab hai miltī sazā

daur-e-nau kī 'ajab munsifī dekh lī

dard-e-ġhurbat vahī bas samajh pā.egā

jis ne ḳhud apne ghar muflisī dekh lī

rahbarī ab kareñ bhī to kaise 'kashish'

is siyāsat kī har gandagī dekh lī

zulm ki har taraf tirgi dekh li

'ilm phaila jahan raushni dekh li

naz naKHre ada sadgi dekh li

phul banne se pahle kali dekh li

tum mile aur mil kar bichhaD bhi gae

is bahane magar zindagi dekh li

mushkilon mein jo khote nahin hausla

aise logon ki zinda-dili dekh li

'aib-jui se pahle ye socho kabhi

tum ne kya apni har ek kami dekh li

ek qatra bhi milta nahin pyas mein

hum ne dariya ki dariya-dili dekh li

chand sikkon ki KHatir jo beche ana

sari duniya ne us ki KHudi dekh li

be-KHata ko yahan ab hai milti saza

daur-e-nau ki 'ajab munsifi dekh li

dard-e-ghurbat wahi bas samajh paega

jis ne KHud apne ghar muflisi dekh li

rahbari ab karen bhi to kaise 'kashish'

is siyasat ki har gandagi dekh li