zulm sah kar unhen hasrat se taka karte hain

zulm sah kar unheñ hasrat se takā karte haiñ

ham nigāhoñ se bhī fariyād kiyā karte haiñ

mujh se ye kah ke vo tāvīl-e-jafā karte haiñ

ham tujhe ḳhūgar-e-taslīm-o-razā karte haiñ

ġham meñ ham aish ko yuuñ jalva-numā karte haiñ

dard ko dard kī lazzat meñ fanā karte haiñ

ye bhī mumkin hai ki ġham se ho ḳhushī kī takmīl

ashk bhī josh-e-masarrat meñ bahā karte haiñ

jis se mālūm ye hotā hai ki nazdīk hai tū

ham bhī vo duur kī āvāz sunā karte haiñ

be-ḳhabar apne farā.ez se na ġham hai na junūñ

ham hañsā karte haiñ aur ashk bahā karte haiñ

jaan dete the kabhī ziist pe ham ai 'shādāñ'

ab to marne kī tamannā meñ jiyā karte haiñ

zulm sah kar unhen hasrat se taka karte hain

hum nigahon se bhi fariyaad kiya karte hain

mujh se ye kah ke wo tawil-e-jafa karte hain

hum tujhe KHugar-e-taslim-o-raza karte hain

gham mein hum aish ko yun jalwa-numa karte hain

dard ko dard ki lazzat mein fana karte hain

ye bhi mumkin hai ki gham se ho KHushi ki takmil

ashk bhi josh-e-masarrat mein baha karte hain

jis se malum ye hota hai ki nazdik hai tu

hum bhi wo dur ki aawaz suna karte hain

be-KHabar apne faraez se na gham hai na junun

hum hansa karte hain aur ashk baha karte hain

jaan dete the kabhi zist pe hum ai 'shadan'

ab to marne ki tamanna mein jiya karte hain