zulmat-e-gham se na shab ki tirgi se KHauf kha

zulmat-e-ġham se na shab kī tīrgī se ḳhauf khā

dost ban kar jo Dase us raushnī se ḳhauf khā

hurmat-e-aslāf hai is band muTThī kī asaas

apnī rusvā.ī se Dar dast-e-tahī se ḳhauf khā

āj-kal do dhaar kī talvār haiñ alfāz bhī

jāduī lahje kī hamla-āvarī se ḳhauf khā

sāzishoñ ne ruḳh pe Daale haiñ bahut dilkash naqāb

vaqt kī mā'sūm sūrat sādgī se ḳhauf khā

tū mirī barbādiyoñ par kis liye hai mutma.in

mushta'il kab ho mirī dīvāngī se ḳhauf khā

buġhz-fitrat aañkh meñ terā khaTaktā hai vujūd

maslahat-āmez kīna-parvarī se ḳhauf khā

tujh ko terī gumrahī duniyā se ojhal kar na de

bikhrī bikhrī ab to apnī be-hisī se ḳhauf khā

tere lahje meñ simaT aa.ī hai kaḌvāhaT bahut

zahr jo ban jaa.e aisī shā'irī se ḳhauf khā

tang-dil koī agar fayyāz ho jaa.e to Dar

ai 'zafar' kam-zarf kī dariyā-dilī se ḳhauf khā

zulmat-e-gham se na shab ki tirgi se KHauf kha

dost ban kar jo Dase us raushni se KHauf kha

hurmat-e-aslaf hai is band muTThi ki asas

apni ruswai se Dar dast-e-tahi se KHauf kha

aaj-kal do dhaar ki talwar hain alfaz bhi

jadui lahje ki hamla-awari se KHauf kha

sazishon ne ruKH pe Dale hain bahut dilkash naqab

waqt ki ma'sum surat sadgi se KHauf kha

tu meri barbaadiyon par kis liye hai mutmain

mushta'il kab ho meri diwangi se KHauf kha

bughz-fitrat aankh mein tera khaTakta hai wujud

maslahat-amez kina-parwari se KHauf kha

tujh ko teri gumrahi duniya se ojhal kar na de

bikhri bikhri ab to apni be-hisi se KHauf kha

tere lahje mein simaT aai hai kaDwahaT bahut

zahr jo ban jae aisi sha'iri se KHauf kha

tang-dil koi agar fayyaz ho jae to Dar

ai 'zafar' kam-zarf ki dariya-dili se KHauf kha