zulmat hai to phir shoala-e-shab-gir nikalo

zulmat hai to phir sho.ala-e-shab-gīr nikālo

ḳhurshīd koī shab kā jigar chiir nikālo

kaTtā hai kabhī nāḳhun-e-añgusht se kohsār

patthar na kuredo koī tadbīr nikālo

maiñ gul huuñ mujhe shāḳh pe khilnā hai ba-har-taur

tum ḳhaak se gul-ḳhezī kī tāsīr nikālo

tum roġhan-e-ḳhūñ burrish-e-shamshīr se bhar kar

jo chāho mire jism se tasvīr nikālo

jo zehn meñ thā ḳhvāb meñ dekhā hai vahī kuchh

jo chāho ab is ḳhvāb kī ta.abīr nikālo

ye shahr-e-shikasta hai na.e shahr kī buniyād

ik taaza dar-o-bām kī ta.amīr nikālo

aurāq-e-shab-e-rafta siyah hoñge magar tum

is baab se ye surḳhi-e-tahrīr nikālo

zulmat hai to phir shoala-e-shab-gir nikalo

KHurshid koi shab ka jigar chir nikalo

kaTta hai kabhi naKHun-e-angusht se kohsar

patthar na kuredo koi tadbir nikalo

main gul hun mujhe shaKH pe khilna hai ba-har-taur

tum KHak se gul-KHezi ki tasir nikalo

tum roghan-e-KHun burrish-e-shamshir se bhar kar

jo chaho mere jism se taswir nikalo

jo zehn mein tha KHwab mein dekha hai wahi kuchh

jo chaho ab is KHwab ki tabir nikalo

ye shahr-e-shikasta hai nae shahr ki buniyaad

ek taza dar-o-baam ki tamir nikalo

auraq-e-shab-e-rafta siyah honge magar tum

is bab se ye surKHi-e-tahrir nikalo