zulmaton mein jite hain, raushni ke mare hain

zulmatoñ meñ jiite haiñ, raushnī ke maare haiñ

ek hī qabīle ke chāñd aur sitāre haiñ

ratjagoñ ke sāthī haiñ, ashk, āhaTeñ, ḳhushbū

bas yahīñ kahīñ tū hai yā bharam hamāre haiñ

aaj tak to rasman bhī tū ne ye nahīñ pūchhā

ham ne terī furqat meñ kaise din guzāre haiñ

us ne mere pahlū meñ jhāñk kar nahīñ dekhā

choT kitnī gahrī hai zaḳhm kitne saare haiñ

Tahniyoñ kī zīnat the sūliyoñ pe laTke haiñ

ḳhushk zard patte jo mausamoñ ke maare haiñ

ham ne apne purkhoñ ke ehtirām kī ḳhātir

farz bhī nibhāyā hai, qarz bhī utāre haiñ

maiñ to ik musāfir huuñ merā kaam hai chalnā

manzileñ tumhārī haiñ rāste tumhāre haiñ

dil se tai to ho jaa.e saath kis ke jaanā hai

rāste nikalne ko yuuñ to Dher saare haiñ

ham ne kal zamāne ko raushnī dikhā.ī hai

aaj ham zamāne kī raushnī ke maare haiñ

zulmaton mein jite hain, raushni ke mare hain

ek hi qabile ke chand aur sitare hain

ratjagon ke sathi hain, ashk, aahaTen, KHushbu

bas yahin kahin tu hai ya bharam hamare hain

aaj tak to rasman bhi tu ne ye nahin puchha

hum ne teri furqat mein kaise din guzare hain

us ne mere pahlu mein jhank kar nahin dekha

choT kitni gahri hai zaKHm kitne sare hain

Tahniyon ki zinat the suliyon pe laTke hain

KHushk zard patte jo mausamon ke mare hain

hum ne apne purkhon ke ehtiram ki KHatir

farz bhi nibhaya hai, qarz bhi utare hain

main to ek musafir hun mera kaam hai chalna

manzilen tumhaari hain raste tumhaare hain

dil se tai to ho jae sath kis ke jaana hai

raste nikalne ko yun to Dher sare hain

hum ne kal zamane ko raushni dikhai hai

aaj hum zamane ki raushni ke mare hain