ajab dahshat mein hai Duba hua manzar jahan main hun

ajab dahshat meñ hai Duubā huā manzar jahāñ maiñ huuñ

dhamāke gūñjne lagte haiñ rah rah kar jahāñ maiñ huuñ

koī chīḳhe to jaise aur baḌh jaatā hai sannāTā

sabhī ke kaan haiñ ḳhud apnī aahaT par jahāñ maiñ huuñ

khulī haiñ khiḌkiyāñ phir bhī ghuTan mahsūs hotī hai

guzartī hai makānoñ se havā bach kar jahāñ maiñ huuñ

siyāsat jab kabhī añgḌā.iyāñ letī hai sansad meñ

qayāmat nānchne lagtī hai saḌkoñ par jahāñ maiñ huuñ

samūcha shahr merā zalzaloñ kī zad pe rakkhā hai

jagah se haT chuke haiñ niiv ke patthar jahāñ maiñ huuñ

kabhī marghaT kī ḳhāmoshī kabhī mahshar kā hangāma

badal detā hai mausam nit nayā tevar jahāñ maiñ huuñ

ghulegī par harārat barf meñ paidā nahīñ hogī

vahāñ har aadmī hai barf se bad-tar jahāñ maiñ huuñ

parā.e dard se nisbat kisī ko bhī nahīñ lekin

jise dekho vahī bantā hai paiġhambar jahāñ maiñ huuñ

sadan meñ is taraf haiñ log gūñge us taraf bahre

nahīñ miltā kisī bhī prashn kā uttar jahāñ maiñ huuñ

mazā lete haiñ sab ek dūsre ke zaḳhm gin gin kar

magar har shaḳhs hai apne lahū meñ tar jahāñ maiñ huuñ

use girnā hai to yak-bārgī gir kyuuñ nahīñ jaatī

laTaktī hai sadā talvār kyuuñ sar par jahāñ maiñ huuñ

ajab dahshat mein hai Duba hua manzar jahan main hun

dhamake gunjne lagte hain rah rah kar jahan main hun

koi chiKHe to jaise aur baDh jata hai sannaTa

sabhi ke kan hain KHud apni aahaT par jahan main hun

khuli hain khiDkiyan phir bhi ghuTan mahsus hoti hai

guzarti hai makanon se hawa bach kar jahan main hun

siyasat jab kabhi angDaiyan leti hai sansad mein

qayamat nanchne lagti hai saDkon par jahan main hun

samucha shahr mera zalzalon ki zad pe rakkha hai

jagah se haT chuke hain niw ke patthar jahan main hun

kabhi marghaT ki KHamoshi kabhi mahshar ka hangama

badal deta hai mausam nit naya tewar jahan main hun

ghulegi par hararat barf mein paida nahin hogi

wahan har aadmi hai barf se bad-tar jahan main hun

parae dard se nisbat kisi ko bhi nahin lekin

jise dekho wahi banta hai paighambar jahan main hun

sadan mein is taraf hain log gunge us taraf bahre

nahin milta kisi bhi prashn ka uttar jahan main hun

maza lete hain sab ek dusre ke zaKHm gin gin kar

magar har shaKHs hai apne lahu mein tar jahan main hun

use girna hai to yak-bargi gir kyun nahin jati

laTakti hai sada talwar kyun sar par jahan main hun