apni siyah piTh chhupata hai aaina

apnī siyāh piiTh chhupātā hai aa.ina

sab ko hamāre daaġh dikhātā hai aa.ina

us kā na koī diin, na īmān nā dharam

is haath se us haath meñ jaatā hai aa.ina

khaa.ī zarā sī choT to TukḌoñ meñ baT gayā

ham ko bhī apnī shakl meñ laatā hai aa.ina

ham TuuT bhī ga.e to ye bolā na ek baar

jab ḳhud girā to shor machātā hai aa.ina

shikva nahīñ ki kyuuñ ye kahīñ Dagmagā gayā

shikva to ye hai aks hilātā hai aa.ina

har pal nahā rahā hai hamāre hī ḳhuun se

paanī se ab kahāñ ye nahātā hai aa.ina

sajne ke vaqt bhī ye hameñ de gayā kharoñch

bas naam kā hī bhāgya-vidhātā hai aa.ina

apni siyah piTh chhupata hai aaina

sab ko hamare dagh dikhata hai aaina

us ka na koi din, na iman na dharam

is hath se us hath mein jata hai aaina

khai zara si choT to TukDon mein baT gaya

hum ko bhi apni shakl mein lata hai aaina

hum TuT bhi gae to ye bola na ek bar

jab KHud gira to shor machata hai aaina

shikwa nahin ki kyun ye kahin Dagmaga gaya

shikwa to ye hai aks hilata hai aaina

har pal naha raha hai hamare hi KHun se

pani se ab kahan ye nahata hai aaina

sajne ke waqt bhi ye hamein de gaya kharonch

bas nam ka hi bhagya-widhata hai aaina