hum le ke apna mal jo mele mein aa gae

ham le ke apnā maal jo mele meñ aa ga.e

saare dukān-dār dukāneñ baḌhā ga.e

bastī ke qatl-e-ām pe niklī na aah bhī

ḳhud ko lagī jo choT to dariyā bahā ga.e

duniyā ki shohrateñ haiñ unhīñ ke nasīb meñ

andāz jin ko baat banāne ke aa ga.e

fankār to zamāne meñ gumnām hī rahe

tājir the jo hunar ke zamāne pe chhā ga.e

donoñ hī ek jaise haiñ kuTiyā ho yā mahal

dīvār-o-dar ke ma.ānī samajh meñ jo aa ga.e

nazreñ haTā liiñ apnī to ye mo.ajiza huā

jalve simaT ke ḳhud mirī āñkhoñ meñ aa ga.e

panDit ulajh ke rah ga.e pothī ke jaal meñ

kyā chiiz hai ye zindagī bachche batā ga.e

hum le ke apna mal jo mele mein aa gae

sare dukan-dar dukanen baDha gae

basti ke qatl-e-am pe nikli na aah bhi

KHud ko lagi jo choT to dariya baha gae

duniya ki shohraten hain unhin ke nasib mein

andaz jin ko baat banane ke aa gae

fankar to zamane mein gumnam hi rahe

tajir the jo hunar ke zamane pe chha gae

donon hi ek jaise hain kuTiya ho ya mahal

diwar-o-dar ke maani samajh mein jo aa gae

nazren haTa lin apni to ye moajiza hua

jalwe simaT ke KHud meri aankhon mein aa gae

panDit ulajh ke rah gae pothi ke jal mein

kya chiz hai ye zindagi bachche bata gae