har ek qadam pe is liye ghabra raha hai dil

har ik qadam pe is liye ghabrā rahā hai dil

maiñ huuñ gunāhgār sazā pā rahā hai dil

ye dar-ba-dar hī Thokareñ khātā rahā sadā

kyā guzrī us pe 'ishq meñ batlā rahā hai dil

insāniyat kā daur bhī ab to rahā nahīñ

so dushmanoñ ke biich ḳhushī pā rahā hai dil

āñkhoñ meñ muflisoñ kī jo manzar haiñ ḳhauf ke

yuuñ zindagī se ab mirā uktā rahā hai dil

kyoñ aadmī hī aadmī ko qatl kar rahā

ye soch soch kar mirā ghabrā rahā hai dil

sochā thā tujh ko bhuul ke mil jā.egā qarār

ab to isī ḳhayāl se pachhtā rahā hai dil

gulshan meñ phuul aaj bhī ik saath khil rahe

insāñ kī dushmanī se phaTā jā rahā hai dil

ye husn aur 'ishq kī bāteñ to sab kareñ

ulfat se thak ke yaar ye sustā rahā hai dil

ik raat chāñd chhūne kī dil meñ ḳhalish huī

ye ḳhvāb ik fareb hai samjhā rahā hai dil

chhat par jo aa ke us ne bhī zulfeñ haiñ khol diiñ

'ātish' falak pe chāñd kā sharmā rahā hai dil

har ek qadam pe is liye ghabra raha hai dil

main hun gunahgar saza pa raha hai dil

ye dar-ba-dar hi Thokaren khata raha sada

kya guzri us pe 'ishq mein batla raha hai dil

insaniyat ka daur bhi ab to raha nahin

so dushmanon ke bich KHushi pa raha hai dil

aankhon mein muflison ki jo manzar hain KHauf ke

yun zindagi se ab mera ukta raha hai dil

kyon aadmi hi aadmi ko qatl kar raha

ye soch soch kar mera ghabra raha hai dil

socha tha tujh ko bhul ke mil jaega qarar

ab to isi KHayal se pachhta raha hai dil

gulshan mein phul aaj bhi ek sath khil rahe

insan ki dushmani se phaTa ja raha hai dil

ye husn aur 'ishq ki baaten to sab karen

ulfat se thak ke yar ye susta raha hai dil

ek raat chand chhune ki dil mein KHalish hui

ye KHwab ek fareb hai samjha raha hai dil

chhat par jo aa ke us ne bhi zulfen hain khol din

'atish' falak pe chand ka sharma raha hai dil