jahan jate hain hum koi kahani chhoD jate hain

jahāñ jaate haiñ ham koī kahānī chhoḌ jaate haiñ

zarā sā pyaar thoḌī sī javānī chhoḌ aate haiñ

kahānī raam kī van-vāsiyoñ par faḳhr kartī hai

usūloñ ke liye jo rājdhānī chhoḌ aate haiñ

hamāre mai-kade kā ḳhaas ye dastūr hai vaa.iz

yahāñ aa.e to bāhar bad-gumānī chhoḌ aate haiñ

kahīñ par dil nahīñ miltā kahīñ mahfil nahīñ miltī

isī chakkar meñ ham shāmeñ suhānī chhoḌ aate haiñ

kabhī jab ḳhud se milne kī zarūrat pesh aatī hai

sunahre ḳhvāb bāteñ āsmānī chhoḌ aate haiñ

mohabbat meñ 'uday' denā na dil kam-zarf logoñ ko

na.ī kī dhun meñ jo chīzeñ purānī chhoḌ aate haiñ

jahan jate hain hum koi kahani chhoD jate hain

zara sa pyar thoDi si jawani chhoD aate hain

kahani ram ki wan-wasiyon par faKHr karti hai

usulon ke liye jo rajdhani chhoD aate hain

hamare mai-kade ka KHas ye dastur hai waiz

yahan aae to bahar bad-gumani chhoD aate hain

kahin par dil nahin milta kahin mahfil nahin milti

isi chakkar mein hum shamen suhani chhoD aate hain

kabhi jab KHud se milne ki zarurat pesh aati hai

sunahre KHwab baaten aasmani chhoD aate hain

mohabbat mein 'uday' dena na dil kam-zarf logon ko

nai ki dhun mein jo chizen purani chhoD aate hain