mat puchhiye ki kaise safar kaT rahe hain

mat pūchhiye ki kaise safar kaaT rahe haiñ

har saañs ik sazā hai magar kaaT rahe haiñ

ḳhāmosh āsmān ke saa.e meñ har ik baar

ham apnī hasratoñ ke hī sar kaaT rahe haiñ

kamzor chhat se aaj bhī ek iiñT girī hai

kuchh log haiñ ki phir bhī ġhadar kaaT rahe haiñ

aadhī to jiibh apne hī dāñtoñ ne katar lī

baaqī bachī ko maun adhar kaaT rahe haiñ

dekhe haiñ jab se auroñ ke bahte hue aañsū

ham apne āñsuoñ kī ḳhabar kaaT rahe haiñ

har gaañv pūchhtā hai musāfir se yahī baat

kyā tum ko bhī tumhāre nagar kaaT rahe haiñ

ab zahr ban gayā hai nayā dost hamārā

ham apne mantr kā hī asar kaaT rahe haiñ

kaise baheliye haiñ ki jo āḳhirī dam tak

ham ko uḌā rahe haiñ na par kaaT rahe haiñ

mat puchhiye ki kaise safar kaT rahe hain

har sans ek saza hai magar kaT rahe hain

KHamosh aasman ke sae mein har ek bar

hum apni hasraton ke hi sar kaT rahe hain

kamzor chhat se aaj bhi ek inT giri hai

kuchh log hain ki phir bhi ghadar kaT rahe hain

aadhi to jibh apne hi danton ne katar li

baqi bachi ko maun adhar kaT rahe hain

dekhe hain jab se auron ke bahte hue aansu

hum apne aansuon ki KHabar kaT rahe hain

har ganw puchhta hai musafir se yahi baat

kya tum ko bhi tumhaare nagar kaT rahe hain

ab zahr ban gaya hai naya dost hamara

hum apne mantr ka hi asar kaT rahe hain

kaise baheliye hain ki jo aaKHiri dam tak

hum ko uDa rahe hain na par kaT rahe hain