raat din uske tamashe dekhta rahta hun main

raat din us ke tamāshe dekhtā rahtā huuñ maiñ

kyā batā.ūñ kis qadar hairat-zada rahtā huuñ maiñ

jāntā huuñ ye havā mujh ko uḌā le jā.egī

bāñdhtā phir bhī nahīñ ḳhud ko khulā rahtā huuñ maiñ

chāñd sūraj qumqumoñ ne kyā bigāḌā hai mirā

raushnī vāloñ se itnā kyuuñ ḳhafā rahtā huuñ maiñ

bañdh ga.e haiñ abr kuchh dāman se mere is tarah

koī bhī mausam ho chāhe bhīgtā rahtā huuñ maiñ

sūrateñ jo āshnā thiiñ ho ga.iiñ dhu.dlī sabhī

ab to bas parchhā.iyoñ se hī ghirā rahtā huuñ maiñ

dastakeñ to chhoḌiye āvāz bhī lāzim nahīñ

''maiñ huuñ darvāza mohabbat kā khulā rahtā huuñ maiñ''

raat din us ke tamashe dekhta rahta hun main

kya bataun kis qadar hairat-zada rahta hun main

jaanta hun ye hawa mujh ko uDa le jaegi

bandhta phir bhi nahin KHud ko khula rahta hun main

chand suraj qumqumon ne kya bigaDa hai mera

raushni walon se itna kyun KHafa rahta hun main

bandh gae hain abr kuchh daman se mere is tarah

koi bhi mausam ho chahe bhigta rahta hun main

suraten jo aashna thin ho gain dhudli sabhi

ab to bas parchhaiyon se hi ghira rahta hun main

dastaken to chhoDiye aawaz bhi lazim nahin

main hun darwaza mohabbat ka khula rahta hun main