sanche mein humne aur ke Dhalne nahin diya

sāñche meñ ham ne aur ke Dhalne nahīñ diyā

dil mom kā thā phir bhī pighalne nahīñ diyā

hāthoñ kī oT de ke jalā liiñ hatheliyāñ

ai sham.a tujh ko ham ne machalne nahīñ diyā

duniyā ne bahut chāhā ki dil jānvar bane

maiñ ne hī us ko jism badalne nahīñ diyā

zid ye thī vo jalegā tumhāre hī haath se

us zid ne ek charāġh ko jalne nahīñ diyā

chehre ko aaj tak bhī terā intizār hai

ham ne gulāl aur ko malne nahīñ diyā

bāhar kī Thokaroñ se to bach kar nikal ga.e

paañv ko apnī moch ne chalne nahīñ diyā

sanche mein hum ne aur ke Dhalne nahin diya

dil mom ka tha phir bhi pighalne nahin diya

hathon ki oT de ke jala lin hatheliyan

ai shama tujh ko hum ne machalne nahin diya

duniya ne bahut chaha ki dil jaanwar bane

main ne hi us ko jism badalne nahin diya

zid ye thi wo jalega tumhaare hi hath se

us zid ne ek charagh ko jalne nahin diya

chehre ko aaj tak bhi tera intizar hai

hum ne gulal aur ko malne nahin diya

bahar ki Thokaron se to bach kar nikal gae

panw ko apni moch ne chalne nahin diya