shor ki is bhiD mein KHamosh tanhai si tum

shor kī is bhiiḌ meñ ḳhāmosh tanhā.ī sī tum

zindagī hai dhūp, to mad-mast purvā.ī sī tum

aaj maiñ bārish meñ jab bhīgā to tum zāhir huiiñ

jaane kab se rah rahī thiiñ mujh meñ añgḌā.ī sī tum

chāhe mahfil meñ rahūñ chāhe akele meñ rahūñ

gūñjtī rahtī ho mujh meñ shoḳh shahnā.ī sī tum

laao vo tasvīr jis meñ pyaar se baiThe haiñ ham

maiñ huuñ kuchh sahmā huā saa, aur sharmā.ī sī tum

maiñ agar motī nahīñ bantā to kyā bantā 'kuñvar'

ho mire chāroñ taraf sāgar kī gahrā.ī sī tum

shor ki is bhiD mein KHamosh tanhai si tum

zindagi hai dhup, to mad-mast purwai si tum

aaj main barish mein jab bhiga to tum zahir huin

jaane kab se rah rahi thin mujh mein angDai si tum

chahe mahfil mein rahun chahe akele mein rahun

gunjti rahti ho mujh mein shoKH shahnai si tum

lao wo taswir jis mein pyar se baiThe hain hum

main hun kuchh sahma hua sa, aur sharmai si tum

main agar moti nahin banta to kya banta 'kunwar'

ho mere chaaron taraf sagar ki gahrai si tum