tere ishq mein humne dil ko jalaya

tere ishq meñ ham ne dil ko jalāyā

qasam sar kī tere mazā kuchh na aayā

nazar ḳhaar kī shakl aate haiñ sab gul

in āñkhoñ meñ jab se tū aakar samāyā

asar ho na kyuuñ dil meñ dil se jo chāhe

masal sach hai jo us ko DhūñDā vo paayā

chaman meñ hai barsāt kī aamad aamad

ahā āsmāñ par siyah abr chhāyā

machāyā hai moroñ ne kyā shor-e-mahshar

papīhoñ ne kyā pur-ġhazab raT lagāyā

tujhe shaiḳh jis ne banāyā hai momin

hameñ bhī hai hindū usī ne banāyā

tere ishq mein hum ne dil ko jalaya

qasam sar ki tere maza kuchh na aaya

nazar KHar ki shakl aate hain sab gul

in aankhon mein jab se tu aakar samaya

asar ho na kyun dil mein dil se jo chahe

masal sach hai jo us ko DhunDa wo paya

chaman mein hai barsat ki aamad aamad

aha aasman par siyah abr chhaya

machaya hai moron ne kya shor-e-mahshar

papihon ne kya pur-ghazab raT lagaya

tujhe shaiKH jis ne banaya hai momin

hamein bhi hai hindu usi ne banaya