ye lafz aaine hain mat inhen uchhaal ke chal

ye lafz aa.ine haiñ mat inheñ uchhāl ke chal

adab kī raah milī hai to dekh-bhāl ke chal

kahe jo tujh se use sun, amal bhī kar us par

ġhazal kī baat hai is ko na aise Taal ke chal

sabhī ke kaam meñ ā.eñge vaqt paḌne par,

tū apne saare tajarbe ġhazal meñ Dhaal ke chal

milī hai zindagī tujh ko isī hī maqsad se

sambhāl ḳhud ko bhī auroñ ko bhī sambhāl ke chal

ki us ke dar pe binā māñge sab hī miltā hai

chalā hai rab kī taraf to binā savāl ke chal

agar ye paañv meñ hote to chal bhī saktā thā

ye shuul dil meñ chubhe haiñ inheñ nikāl ke chal

tujhe bhī chaah ujāle ki hai, mujhe bhī 'kuñvar'

bujhe charāġh kahīñ hoñ to un ko baal ke chal

ye lafz aaine hain mat inhen uchhaal ke chal

adab ki rah mili hai to dekh-bhaal ke chal

kahe jo tujh se use sun, amal bhi kar us par

ghazal ki baat hai is ko na aise Tal ke chal

sabhi ke kaam mein aaenge waqt paDne par,

tu apne sare tajarbe ghazal mein Dhaal ke chal

mili hai zindagi tujh ko isi hi maqsad se

sambhaal KHud ko bhi auron ko bhi sambhaal ke chal

ki us ke dar pe bina mange sab hi milta hai

chala hai rab ki taraf to bina sawal ke chal

agar ye panw mein hote to chal bhi sakta tha

ye shul dil mein chubhe hain inhen nikal ke chal

tujhe bhi chah ujale ki hai, mujhe bhi 'kunwar'

bujhe charagh kahin hon to un ko baal ke chal