kis nur ki majlis mein meri jalwagari hai

kis nuur kī majlis meñ mirī jalvagarī hai

kis nuur kī majlis meñ mirī jalvagarī hai

jis nuur se pur-nūr ye nūr-e-nazarī hai

aamad hī meñ hairān qayās-e-bashrī hai

ye kaun sī tasvīr-e-tajallī se bharī hai

go husn kā rutba nahīñ mazkūr huā hai

mimbar mirā ham-martaba-e-tūr huā hai

sad shukr ki majlis marī mushtāq-e-suḳhan hai

ye faiz-e-ināyāt-e-husain aur hasan hai

phir josh-e-javānī pe marī tab.a-e-kuhan hai

ye quvvat-e-imdād shah-e-tishna-dahan hai

naqqāsh meñ ye san.at-e-tahrīr nahīñ hai

tasvīr dikhātā huuñ ye taqrīr nahīñ hai

naqqāsh to kartā hai qalam le ke ye tadbīr

ik shakl na.ī safha-e-qirtās pe tahrīr

insāf karo kilk-e-zabāñ se dam-e-tahrīr

maiñ safha-e-bātin meñ raqam kartā huuñ tasvīr

sau rañg se tasvīr musavvir ne bharī hai

rañgīni-e-mazmūñ kī kahāñ jalvagarī hai

tasvīr maiñ us shaḳhs kī huuñ tum ko dikhātā

jo sānī-e-mahbūb-e-ilāhī hai kahātā

ik nuur jo jaatā hai to ik nuur hai aatā

vaj.h-e-adam-e-sāya-e-ahmad huuñ sunātā

thā ba.ad-e-mohammad ke jo aayā alī akbar

thā ahmad-e-muḳhtār kā saaya alī akbar

yaañ tak suḳhan-e-tāza kiyā tab.a ne paidā

vo nūr-e-nabī aur nabī nūr-e-ḳhudā kā

ye silsila-e-nūr kahāñ jā ke hai pahuñchā

akbar ko jo dekhā to batāo kise dekhā

vallāh ziyārat kā sazā-vār hai akbar

nemul-badal ahmad0-e-muḳhtār hai akbar

lekin tumheñ tasvīr ye kartī hai ishārat

haañ majlisiyāñ roza-e-jannat kī bashārat

ho mahv-e-tahārat hai agar qasd-e-ziyārat

hai lāzim-o-malzūm ziyārat ko tahārat

is qasd pe baiThe ho jo sāhib-e-nazaro tum

tajdīd-e-vazū ashk ke paanī se karo tum

likhā hai ki thī hazrat-e-shabbīr ko aadat

hotī thī namāz-e-sahrī se jo farāġhat

pahle alī akbar hī ko bulvāte the hazrat

farmāte the kartā huuñ ibādat meñ ibādat

raushan ho na kyuuñ chashm-e-husain ibn-e-alī

kartā huuñ ziyārat meñ jamāl-e-nubvī kī

karte alī akbar to jhukā farq ko mujrā

har martaba mil jaatā thā paañv se sar un kā

kis nur ki majlis mein meri jalwagari hai

kis nur ki majlis mein meri jalwagari hai

jis nur se pur-nur ye nur-e-nazari hai

aamad hi mein hairan qayas-e-bashri hai

ye kaun si taswir-e-tajalli se bhari hai

go husn ka rutba nahin mazkur hua hai

mimbar mera ham-martaba-e-tur hua hai

sad shukr ki majlis mari mushtaq-e-suKHan hai

ye faiz-e-inayat-e-husain aur hasan hai

phir josh-e-jawani pe mari taba-e-kuhan hai

ye quwwat-e-imdad shah-e-tishna-dahan hai

naqqash mein ye sanat-e-tahrir nahin hai

taswir dikhata hun ye taqrir nahin hai

naqqash to karta hai qalam le ke ye tadbir

ek shakl nai safha-e-qirtas pe tahrir

insaf karo kilk-e-zaban se dam-e-tahrir

main safha-e-baatin mein raqam karta hun taswir

sau rang se taswir musawwir ne bhari hai

rangini-e-mazmun ki kahan jalwagari hai

taswir main us shaKHs ki hun tum ko dikhata

jo sani-e-mahbub-e-ilahi hai kahata

ek nur jo jata hai to ek nur hai aata

wajh-e-adam-e-saya-e-ahmad hun sunata

tha baad-e-mohammad ke jo aaya ali akbar

tha ahmad-e-muKHtar ka saya ali akbar

yan tak suKHan-e-taza kiya taba ne paida

wo nur-e-nabi aur nabi nur-e-KHuda ka

ye silsila-e-nur kahan ja ke hai pahuncha

akbar ko jo dekha to batao kise dekha

wallah ziyarat ka saza-war hai akbar

nemul-badal ahmad0-e-muKHtar hai akbar

lekin tumhein taswir ye karti hai ishaarat

han majlisiyan roza-e-jannat ki bashaarat

ho mahw-e-tahaarat hai agar qasd-e-ziyarat

hai lazim-o-malzum ziyarat ko tahaarat

is qasd pe baiThe ho jo sahib-e-nazaro tum

tajdid-e-wazu ashk ke pani se karo tum

likha hai ki thi hazrat-e-shabbir ko aadat

hoti thi namaz-e-sahri se jo faraghat

pahle ali akbar hi ko bulwate the hazrat

farmate the karta hun ibaadat mein ibaadat

raushan ho na kyun chashm-e-husain ibn-e-ali

karta hun ziyarat mein jamal-e-nubwi ki

karte ali akbar to jhuka farq ko mujra

har martaba mil jata tha panw se sar un ka