aa chuka stage par shola-badan apni jagah

aa chukā stage par sho'la-badan apnī jagah

kaise baiTheñ ḳhāmushī se mard-o-zan apnī jagah

sirf thoḌā sā unheñ ġhussa dilā detā huuñ maiñ

ḳhud banā letī hai māthe par shikan apnī jagah

jaane kyā hogā mire dūlhā kā ab radd-e-'amal

Dar rahī hai dho ke chehre ko dulhan apnī jagah

ramz kal mujh par ayaañ kī ek business-man ne

kārobār apnī jagah hubb-e-vatan apnī jagah

terā ye e'zāz hai ki uTh khaḌe hote haiñ log

kaun varna chhoḌtā hai jān-e-man apnī jagah

ahl-e-dil pahle badalte haiñ nazar kā zā.iqa

baa'd meñ phir lazzat-e-kām-o-dahan apnī jagah

daad de saktā huuñ par be-vazn kah saktā nahīñ

husn-e-zan apnī jagah mashq-e-suḳhan apnī jagah

aa chuka stage par sho'la-badan apni jagah

kaise baiThen KHamushi se mard-o-zan apni jagah

sirf thoDa sa unhen ghussa dila deta hun main

KHud bana leti hai mathe par shikan apni jagah

jaane kya hoga mere dulha ka ab radd-e-'amal

Dar rahi hai dho ke chehre ko dulhan apni jagah

ramz kal mujh par ayan ki ek business-man ne

karobar apni jagah hubb-e-watan apni jagah

tera ye e'zaz hai ki uTh khaDe hote hain log

kaun warna chhoDta hai jaan-e-man apni jagah

ahl-e-dil pahle badalte hain nazar ka zaiqa

ba'd mein phir lazzat-e-kaam-o-dahan apni jagah

dad de sakta hun par be-wazn kah sakta nahin

husn-e-zan apni jagah mashq-e-suKHan apni jagah