ahmaqon ki conference

ik ḳhabar ham ne paḌhī thī kal kisī aḳhbār meñ

ahmaqoñ kā ek jalsa thā kahīñ bāzār meñ

har namūne kā chuġhad hāzir thā is darbār meñ

jaise har Type kā āshiq kūcha-e-dildār meñ

thā har ik mehmāñ yahāñ nā-ḳhvāñda o ḳhud-sāḳhta

koī un meñ sāhib-e-dil thā koī dil-bāḳhta

sab se pahle ik baḌā ahmaq huā yuuñ sho.ala-bār

gentleman and ladies aar what ever yū aar

aaj a.asāb-e-vatan par aql-o-dānish haiñ savār

ḳhatm hotā jā rahā hai ahmaqoñ kā eqtidār

ahmaqo jaago tumhārī aabrū ḳhatre meñ hai

jis ke sākin ho vo shahr-e-ārzū ḳhatre meñ hai

har himāqat kā koī mafhūm honā chāhiye

kyuuñ himāqat kī ga.ī ma.alūm honā chāhiye

aadmī ko aql se mahrūm honā chāhiye

kyā zarūrat hai humā kī buum honā chāhiye

is liye ham ne banāyā hai ye manifesto

''man tirā ahmaq bagoyam tū murā ahmaq bago''

bhūltī jaatī hai duniyā ab ye qaul-e-mustanad

aql chuuñ puḳhta shavad insān ahmaq mī shavad

fitratan ahmaq ho jo insāñ nahīñ hotā vo bad

vo himāqat sab se achchhī kuchh nahīñ ho jis kī had

kuchh sahī ik ḳhar mohabbat us kā nasabulain hai

vo bhī us insāñ se achchhā hai jo business-main hai

ab rahā ye mas.ala kapḌe nahīñ haiñ apne paas

is ke baare meñ resolution kiyā jā.egā paas

atlas o kam-ḳhvāb ko ham nahīñ ā.eñge raas

sab se achchhā hai ki pahneñ log pattoñ kā libās

nāriyal aur kele kā pata ho yā injīr kā

qudratī ho pairahan har paikar-e-tasvīr kā

ek KHabar hum ne paDhi thi kal kisi aKHbar mein

ahmaqon ka ek jalsa tha kahin bazar mein

har namune ka chughad hazir tha is darbar mein

jaise har Type ka aashiq kucha-e-dildar mein

tha har ek mehman yahan na-KHwanda o KHud-saKHta

koi un mein sahib-e-dil tha koi dil-baKHta

sab se pahle ek baDa ahmaq hua yun shoala-bar

gentleman and ladies aar what ewer yu aar

aaj aasab-e-watan par aql-o-danish hain sawar

KHatm hota ja raha hai ahmaqon ka eqtidar

ahmaqo jago tumhaari aabru KHatre mein hai

jis ke sakin ho wo shahr-e-arzu KHatre mein hai

har himaqat ka koi mafhum hona chahiye

kyun himaqat ki gai malum hona chahiye

aadmi ko aql se mahrum hona chahiye

kya zarurat hai huma ki bum hona chahiye

is liye hum ne banaya hai ye manifesto

man tera ahmaq bagoyam tu mura ahmaq bago

bhulti jati hai duniya ab ye qaul-e-mustanad

aql chun puKHta shawad insan ahmaq mi shawad

fitratan ahmaq ho jo insan nahin hota wo bad

wo himaqat sab se achchhi kuchh nahin ho jis ki had

kuchh sahi ek KHar mohabbat us ka nasabulain hai

wo bhi us insan se achchha hai jo business-main hai

ab raha ye masala kapDe nahin hain apne pas

is ke bare mein resolution kiya jaega pas

atlas o kam-KHwab ko hum nahin aaenge ras

sab se achchha hai ki pahnen log patton ka libas

nariyal aur kele ka pata ho ya injir ka

qudrati ho pairahan har paikar-e-taswir ka