chala kar tir-e-mizhgan yun wo ghabraya nahin karte

chalā kar tīr-e-mizhgāñ yuuñ vo ghabrāyā nahīñ karte

jo marte haiñ hasīnoñ par vo mar jaayā nahīñ karte

bharose par kisī leader ke rahnā ik himāqat hai

ye sūkhe peḌ haiñ yaaro kabhī saaya nahīñ karte

hasīnoñ ko na ghūro shaiḳh jī palkeñ to jhapkāo

za.īfī meñ to itnī raal Tapkāyā nahīñ karte

janāb-e-shaiḳh sattar saal meñ karte ho kyuuñ shādī

nahīñ haiñ daañt to phir gosht bhī khāyā nahīñ karte

unheñ mehmān kahiye ahl-e-ḳhāna kahiye kyā kahiye

jo aa jaate haiñ ik din aaTh din jaayā nahīñ karte

sunā karte haiñ ronā aur gaanā sab ko aatā hai

sadā royā to karte haiñ kabhī gaayā nahīñ karte

tumhāre chīḳhne chillāne kā ho kyā asar mujh par

garajte haiñ jo bādal meñh vo barsāyā nahīñ karte

ġharīboñ kā bahā kar ḳhuun hamdardī jatāte ho

khilaune haath meñ de de ke bahlāyā nahīñ karte

'rahīm' ab kostā kyuuñ hai tirī qismat hī khoTī thī

jo qismat meñ likhā hai us pe pachhtāyā nahīñ karte

chala kar tir-e-mizhgan yun wo ghabraya nahin karte

jo marte hain hasinon par wo mar jaya nahin karte

bharose par kisi leader ke rahna ek himaqat hai

ye sukhe peD hain yaro kabhi saya nahin karte

hasinon ko na ghuro shaiKH ji palken to jhapkao

zaifi mein to itni ral Tapkaya nahin karte

janab-e-shaiKH sattar sal mein karte ho kyun shadi

nahin hain dant to phir gosht bhi khaya nahin karte

unhen mehman kahiye ahl-e-KHana kahiye kya kahiye

jo aa jate hain ek din aaTh din jaya nahin karte

suna karte hain rona aur gana sab ko aata hai

sada roya to karte hain kabhi gaya nahin karte

tumhaare chiKHne chillane ka ho kya asar mujh par

garajte hain jo baadal meinh wo barsaya nahin karte

gharibon ka baha kar KHun hamdardi jatate ho

khilaune hath mein de de ke bahlaya nahin karte

'rahim' ab kosta kyun hai teri qismat hi khoTi thi

jo qismat mein likha hai us pe pachhtaya nahin karte