chalo dil-dar chalo

hai bahut muuD meñ is vaqt dil-e-zār chalo

tum mire saath chalo aur lagātār chalo

bhaaḌ meñ Daalo har ik vaqt kī dīvār chalo

kahīñ gumrāh na ho jaa.e yahāñ pyaar chalo

ham haiñ jab donoñ mohabbat meñ giraftār chalo

chalo dildār chalo chāñd ke paar chalo

ye jo duniyā hai ye ham ko nahīñ milne degī

umr bhar apnī jagah se na ye hilne degī

ishq ke chāk-e-garebāñ ko na silne degī

pyaar ke ġhunchoñ ko hargiz nahīñ khilne degī

aise aalam meñ munāsib nahīñ inkār chalo

chalo dildār chalo chāñd ke paar chalo

Dālte rahte haiñ Dore ye zamāne ke hasīñ

apnī nazroñ meñ haiñ aise ka.ī ġhārat-gar-e-dīñ

tum ko is baat kā ehsās koī hai ki nahīñ

dil na paḌ jaa.e kisī aur ke chakkar meñ kahīñ

merī maano to abhī chhoḌ ke ghar-bār chalo

chalo dildār chalo chāñd ke paas chalo

rah ke is duniyā meñ tum ne abhī dekhā kyā hai?

bas ye socho ki mohabbat kā taqāza kyā hai?

rishta-dāroñ kī ināyat kā bharosa kyā hai?

saath haiñ ham jo tumhāre tumheñ khaTkā kyā hai?

ab to rahne do bahut ho chukī takrār chalo

chalo dildār chalo chāñd ke paar chalo

ḳhauf-e-rusvā.ī koī chāñd kī duniyā meñ nahīñ

maamī yā taa.ī koī chāñd kī duniyā meñ nahīñ

ek harjā.ī koī chāñd kī duniyā meñ nahīñ

aap kā bhaa.ī koī chāñd kī duniyā meñ nahīñ

ḳhush-nasībī ke nazar aate haiñ āsār, chalo

chalo dildār chalo chāñd ke paar chalo

chāñd ke paar sunā hai ki fazā achchhī hai

surḳh ho jāogī tum āb-o-havā achchhī hai

jis jagah ham haiñ yahāñ se to zarā achchhī hai

maan lo raa.e hamārī ba-ḳhudā achchhī hai

aa.e din tum to yahāñ rahtī ho bīmār chalo

chalo dildār chalo chāñd ke paar chalo

hai bahut muD mein is waqt dil-e-zar chalo

tum mere sath chalo aur lagatar chalo

bhaD mein Dalo har ek waqt ki diwar chalo

kahin gumrah na ho jae yahan pyar chalo

hum hain jab donon mohabbat mein giraftar chalo

chalo dildar chalo chand ke par chalo

ye jo duniya hai ye hum ko nahin milne degi

umr bhar apni jagah se na ye hilne degi

ishq ke chaak-e-gareban ko na silne degi

pyar ke ghunchon ko hargiz nahin khilne degi

aise aalam mein munasib nahin inkar chalo

chalo dildar chalo chand ke par chalo

Dalte rahte hain Dore ye zamane ke hasin

apni nazron mein hain aise kai ghaarat-gar-e-din

tum ko is baat ka ehsas koi hai ki nahin

dil na paD jae kisi aur ke chakkar mein kahin

meri mano to abhi chhoD ke ghar-bar chalo

chalo dildar chalo chand ke pas chalo

rah ke is duniya mein tum ne abhi dekha kya hai?

bas ye socho ki mohabbat ka taqaza kya hai?

rishta-daron ki inayat ka bharosa kya hai?

sath hain hum jo tumhaare tumhein khaTka kya hai?

ab to rahne do bahut ho chuki takrar chalo

chalo dildar chalo chand ke par chalo

KHauf-e-ruswai koi chand ki duniya mein nahin

mami ya tai koi chand ki duniya mein nahin

ek harjai koi chand ki duniya mein nahin

aap ka bhai koi chand ki duniya mein nahin

KHush-nasibi ke nazar aate hain aasar, chalo

chalo dildar chalo chand ke par chalo

chand ke par suna hai ki faza achchhi hai

surKH ho jaogi tum aab-o-hawa achchhi hai

jis jagah hum hain yahan se to zara achchhi hai

man lo rae hamari ba-KHuda achchhi hai

aae din tum to yahan rahti ho bimar chalo

chalo dildar chalo chand ke par chalo