dum-dar nazm

ham kaheñ yā na kaheñ

roz-e-raushan kī tarah

dum kā afsāna farozāñ hī rahā hai ab tak

kulbulātī huī sīmāb sifat aur subuk-rau vo dum

kisī shā.ir ke taḳhayyul kī tarah bāñkī sī

ḳhuub sajtī hai sag-e-lailā par

haa.e afsos vo dum

jo ki nalkī meñ rahī qaid pareshān-o-zubūñ bārah baras

phir bhī niklī to vo TeḌhī niklī

kisī mahbūb ke abrū-e-ḳhamīda kī tarah

kisī shahnāz ke gesū-e-burīda kī tarah

but-e-tannāz ke ausāf-e-hamīda kī tarah

apne markaz kī taraf mā.il-e-parvāz hai dum

dekh kar dum kī vo sīmāb-sifat bāñkī adā

shā.ir-e-vaqt machal jaatā hai

aur pahroñ vo ḳhalāoñ meñ kahīñ

ek begāna tasavvur kī tarah āvāra

saikḌoñ husn-o-mohabbat ke hasīñ naġhmoñ ko

kaaT kar chhāñT ke mehnat se banātā hai sadā

hū-ba-hū dum kī tarah

aur dum jab mire a.asāb pe chhā jaatī hai

hosh uḌ jaate haiñ afkār badal jaate haiñ

saikḌoñ tarah ke hañste hue dum-dār ḳhayāl

phir pareshān mujhe karte haiñ

maiñ taḌap jaatā huuñ

be-sāḳhta kah uThtā huuñ

terī jumbish se numāyāñ hai zamīñ kī jumbish

ai dum

ālam-e-ġhaiz meñ dum jab bhī khaḌī hotī hai

kyā qayāmat kī ghaḌī hotī hai

kaañp jaatā hai jahāñ

hosh rustam ke bhī uḌ jaate haiñ

chaar jānib se sadā aatī hai ai dum ai dum

ab to nīchī ho jā

aur duniyā-e-mohabbat pe kar ehsān ai dum

ya.anī mahbūb ke pīchhe lag jā

taaki dum-dār ye sadiyoñ kā sitamgar ho jaa.e

aur bhāge jo chhuḌā kar kabhī apnā dāman

dum se pakḌā jaa.e

hum kahen ya na kahen

roz-e-raushan ki tarah

dum ka afsana farozan hi raha hai ab tak

kulbulati hui simab sifat aur subuk-rau wo dum

kisi shair ke taKHayyul ki tarah banki si

KHub sajti hai sag-e-laila par

hae afsos wo dum

jo ki nalki mein rahi qaid pareshan-o-zubun barah baras

phir bhi nikli to wo TeDhi nikli

kisi mahbub ke abru-e-KHamida ki tarah

kisi shahnaz ke gesu-e-burida ki tarah

but-e-tannaz ke ausaf-e-hamida ki tarah

apne markaz ki taraf mail-e-parwaz hai dum

dekh kar dum ki wo simab-sifat banki ada

shair-e-waqt machal jata hai

aur pahron wo KHalaon mein kahin

ek begana tasawwur ki tarah aawara

saikDon husn-o-mohabbat ke hasin naghmon ko

kaT kar chhanT ke mehnat se banata hai sada

hu-ba-hu dum ki tarah

aur dum jab mere aasab pe chha jati hai

hosh uD jate hain afkar badal jate hain

saikDon tarah ke hanste hue dum-dar KHayal

phir pareshan mujhe karte hain

main taDap jata hun

be-saKHta kah uThta hun

teri jumbish se numayan hai zamin ki jumbish

ai dum

aalam-e-ghaiz mein dum jab bhi khaDi hoti hai

kya qayamat ki ghaDi hoti hai

kanp jata hai jahan

hosh rustam ke bhi uD jate hain

chaar jaanib se sada aati hai ai dum ai dum

ab to nichi ho ja

aur duniya-e-mohabbat pe kar ehsan ai dum

yani mahbub ke pichhe lag ja

taki dum-dar ye sadiyon ka sitamgar ho jae

aur bhage jo chhuDa kar kabhi apna daman

dum se pakDa jae