fikr-e-nil-o-kashghar rakhta hun main

fikr-e-nīl-o-kāshġhar rakhtā huuñ maiñ

kitnā lambā dard-e-sar rakhtā huuñ maiñ

mustaqil azm-e-safar rakhtā huuñ maiñ

ek foot fōtpath par rakhtā huuñ maiñ

kaun sī chhab us ko aa jaa.e pasand

sau tarah ke bhes bhar rakhtā huuñ maiñ

maiñ parindoñ kā siyāsat-dān huuñ

murġh par tilyar ke par rakhtā huuñ maiñ

itnī lambī car apne mulk maiñ

rakh nahīñ saktā magar rakhtā huuñ maiñ

aadmī ''thar pārkar'' kā huuñ magar

yaar ik ''newyorkar'' rakhtā huuñ maiñ

us kī zulf-e-tā-kamar ke vāste

is qadar moTī kamar rakhtā huuñ maiñ

us ke photo ke sivā kuchh jeb meñ

mujh pe la.anat ho agar rakhtā huuñ maiñ

Dar hai tote hī na khā jaa.eñ mujhe

nāshpātī jaisā sar rakhtā huuñ maiñ

sher amānat hai zamāne kī 'zamīr'

apnā qissa muḳhtasar rakhtā huuñ maiñ

fikr-e-nil-o-kashghar rakhta hun main

kitna lamba dard-e-sar rakhta hun main

mustaqil azm-e-safar rakhta hun main

ek foot footpath par rakhta hun main

kaun si chhab us ko aa jae pasand

sau tarah ke bhes bhar rakhta hun main

main parindon ka siyasat-dan hun

murgh par tilyar ke par rakhta hun main

itni lambi car apne mulk main

rakh nahin sakta magar rakhta hun main

aadmi thar parkar ka hun magar

yar ek newyorkar rakhta hun main

us ki zulf-e-ta-kamar ke waste

is qadar moTi kamar rakhta hun main

us ke photo ke siwa kuchh jeb mein

mujh pe lanat ho agar rakhta hun main

Dar hai tote hi na kha jaen mujhe

nashpati jaisa sar rakhta hun main

sher amanat hai zamane ki 'zamir'

apna qissa muKHtasar rakhta hun main