har ek luTere ko dusre ka KHayal hoga ye tai hua tha

har ik luTere ko dūsre kā ḳhayāl hogā ye tai huā thā

barābar us ke baneñge hisse jo maal hogā ye tai huā thā

ye sinf-e-nāzuk ke naam par tum ne chiiz kyā mere palle bāñdhī

hasīn hogī aur us ke ‘āriz pe ḳhaal hogā ye tai huā thā

isī liye to sahāfiyoñ ko ye pur-takalluf dinner diyā hai

kisī taraf se na koī kaḌvā savāl hogā ye tai huā thā

police kahāñ se Tapak paḌī hai kahā ye Daaku ne saTpaTā kar

mudāḳhalat kā na rattī-bhar ehtimāl hogā ye tai huā thā

uThā ke laa.e ho talk-show meñ kahāñ se husn-e-kalām vaale

jo guest haiñ un kī guftugū meñ jalāl hogā ye tai huā thā

ye daal roTī mu’āhide kī ḳhilāf-varzī hai banda-parvar

hamāre aane pe murġh-e-desī halāl hogā ye tai huā thā

tumhāre andāz-e-hukmrānī ko dekh kar log dam-ba-ḳhud haiñ

tumheñ hukūmat milī to koī kamāl hogā ye tai huā thā

har ek luTere ko dusre ka KHayal hoga ye tai hua tha

barabar us ke banenge hisse jo mal hoga ye tai hua tha

ye sinf-e-nazuk ke nam par tum ne chiz kya mere palle bandhi

hasin hogi aur us ke ‘ariz pe KHal hoga ye tai hua tha

isi liye to sahafiyon ko ye pur-takalluf dinner diya hai

kisi taraf se na koi kaDwa sawal hoga ye tai hua tha

police kahan se Tapak paDi hai kaha ye Daku ne saTpaTa kar

mudaKHalat ka na ratti-bhar ehtimal hoga ye tai hua tha

uTha ke lae ho talk-show mein kahan se husn-e-kalam wale

jo guest hain un ki guftugu mein jalal hoga ye tai hua tha

ye dal roTi mu’ahide ki KHilaf-warzi hai banda-parwar

hamare aane pe murgh-e-desi halal hoga ye tai hua tha

tumhaare andaz-e-hukmrani ko dekh kar log dam-ba-KHud hain

tumhein hukumat mili to koi kamal hoga ye tai hua tha