jamal-zada

mire nanhe chāñd mat ro mire shāhazāde so jā

tirī zid kahīñ ai zālim na mujhe rulā de so jā

terā baap mere ghar se mujhe varġhalā ke laayā

huā vasl-dar-jahannam jo mujhe bhagā ke laayā

thā 'jamāl' naam us kā ai jamāl-zāde so jā

tirī zid kahīñ ai zālim na mujhe rulā de so jā

mujhe mohne ko jis ne kiyā roz mujh se dañgā

nahīñ ab vo aane vaalā gayā bhaag vo lafañgā

jise maiñ kabhī na bhūlūñ tū use bhulā de so jā

tirī zid kahīñ ai zālim na mujhe rulā de so jā

vo kivāḌ band kar ke mujhe roz pīTtā thā

kabhī misl-e-chārpā.ī vo mujhe ghasīTtā thā

tū agar hai merā beTā use bad-duā de so jā

tirī zid kahīñ ai zālim na mujhe rulā de so jā

mirī chuTiyā us ne kaaTī mirī Taañg us ne toḌī

mirā kaun hai jahāñ meñ kahāñ jā.ūñ maiñ nigoḌī

jo maiñ kar chukī huuñ us kī na mujhe saaz de so jā

tirī zid kahīñ ai zālim na mujhe rulā de so jā

vo jo āshiqī ke din the vo kabhī ke kaT chuke haiñ

mire bik chuke haiñ zevar mire kapḌe phaT chuke haiñ

kahīñ merī āh-e-sozāñ na tujhe jalā de so jā

tirī zid kahīñ ai zālim na mujhe rulā de so jā

na laboñ pe ab hai surḳhī na vo muñh par ab hai ġhāza

liye jā rahī hai qismat mire ishq kā janāza

kahīñ hādsa ye pāgal na mujhe banā de so jā

tirī zid kahīñ ai zālim na mujhe rulā de so jā

mujhe kaun aasrā de maiñ huuñ shahr meñ akelī

na mirā aziiz koii, na mirī koī sahelī

mire ġham ko mere dukh ko tū hī aasrā de so jā

tirī zid kahīñ ai zālim na mujhe rulā de so jā

mere nanhe chand mat ro mere shahazade so ja

teri zid kahin ai zalim na mujhe rula de so ja

tera bap mere ghar se mujhe warghala ke laya

hua wasl-dar-jahannam jo mujhe bhaga ke laya

tha 'jamal' nam us ka ai jamal-zade so ja

teri zid kahin ai zalim na mujhe rula de so ja

mujhe mohne ko jis ne kiya roz mujh se danga

nahin ab wo aane wala gaya bhag wo lafanga

jise main kabhi na bhulun tu use bhula de so ja

teri zid kahin ai zalim na mujhe rula de so ja

wo kiwaD band kar ke mujhe roz piTta tha

kabhi misl-e-chaarpai wo mujhe ghasiTta tha

tu agar hai mera beTa use bad-dua de so ja

teri zid kahin ai zalim na mujhe rula de so ja

meri chuTiya us ne kaTi meri Tang us ne toDi

mera kaun hai jahan mein kahan jaun main nigoDi

jo main kar chuki hun us ki na mujhe saz de so ja

teri zid kahin ai zalim na mujhe rula de so ja

wo jo aashiqi ke din the wo kabhi ke kaT chuke hain

mere bik chuke hain zewar mere kapDe phaT chuke hain

kahin meri aah-e-sozan na tujhe jala de so ja

teri zid kahin ai zalim na mujhe rula de so ja

na labon pe ab hai surKHi na wo munh par ab hai ghaza

liye ja rahi hai qismat mere ishq ka janaza

kahin hadsa ye pagal na mujhe bana de so ja

teri zid kahin ai zalim na mujhe rula de so ja

mujhe kaun aasra de main hun shahr mein akeli

na mera aziz koi, na meri koi saheli

mere gham ko mere dukh ko tu hi aasra de so ja

teri zid kahin ai zalim na mujhe rula de so ja