kaha laila ki man ne

kahā majnūñ se ye lailā kī maañ ne

ki beTe kyuuñ paḌā hai shahr se duur

karāchī ko banā le ghar yahāñ tū

kisī bhī mil meñ ho jā.egā mazdūr

vo istīfā jo tū ne de diyā thā

abhī tak ho nahīñ paayā hai manzūr

nahīñ ta.alīm kī bhī shart koī

ki ab badle hue haiñ saare dastūr

bas itnī aarzū hai aaj merī

siyāsat meñ tirā hissa ho bharpūr

siyāsī rahnumā the ab se pahle

tire baap aur chachā marhūm o maġhfūr

saḌak par aa ke ye na.ara lagā de

nahīñ hai āmariyyat mujh ko manzūr

agar tū maan le ye maañg merī

to tujh se aqd-e-lailā mujh ko manzūr

abhī mumkin hai us se terī shādī

abhī kuñvārī hai lailā hasb-e-dastūr

kahā majnūñ ne ai lailā kī ammāñ

mujhe kyuuñ vasl par kartī hai majbūr

siyāsat meñ phañsātī hai mujhe kyuuñ

mujhe rahne hī de is gañd se duur

siyāsat se junūñ kā kyā ta.alluq

kujā majnūñ kujā aa.iin o dastūr!

mujhe hairat hai tū kyuuñ chāhtī hai

siyāsat meñ mirā hissa ho bharpūr

rahī shādī to ab is se natīja

na bhar pā.egā is marham se nāsūr

agar das laakh kā tū check de de

to jabran vasl-e-lailā mujh ko manzūr

nahīñ karte haiñ be-rishvat liye kaam

yahī hai majnuoñ kā aaj dastūr

kaha majnun se ye laila ki man ne

ki beTe kyun paDa hai shahr se dur

karachi ko bana le ghar yahan tu

kisi bhi mil mein ho jaega mazdur

wo istifa jo tu ne de diya tha

abhi tak ho nahin paya hai manzur

nahin talim ki bhi shart koi

ki ab badle hue hain sare dastur

bas itni aarzu hai aaj meri

siyasat mein tera hissa ho bharpur

siyasi rahnuma the ab se pahle

tere bap aur chacha marhum o maghfur

saDak par aa ke ye nara laga de

nahin hai aamariyyat mujh ko manzur

agar tu man le ye mang meri

to tujh se aqd-e-laila mujh ko manzur

abhi mumkin hai us se teri shadi

abhi kunwari hai laila hasb-e-dastur

kaha majnun ne ai laila ki amman

mujhe kyun wasl par karti hai majbur

siyasat mein phansati hai mujhe kyun

mujhe rahne hi de is gand se dur

siyasat se junun ka kya talluq

kuja majnun kuja aain o dastur!

mujhe hairat hai tu kyun chahti hai

siyasat mein mera hissa ho bharpur

rahi shadi to ab is se natija

na bhar paega is marham se nasur

agar das lakh ka tu check de de

to jabran wasl-e-laila mujh ko manzur

nahin karte hain be-rishwat liye kaam

yahi hai majnuon ka aaj dastur