ki bas

us ne thāne meñ rapaT kuchh aisī likhvā.ī ki bas

phir police ne kī mirī aisī pazīrā.ī ki bas

ye police vaale kisī ke bhī sage hote nahīñ

in ko rishvat se mile hai vo tavānā.ī ki bas

naukrī mil jaa.e chāhe salary thoḌī ho kam

haañ magar uupar se vo income ho bālā.ī ki bas

maiñ ne begam se kahā hoñge ye bachche kab talak

bolī jab tak apne muñh se kah na de daa.ī ki bas

āj-kal kirdār kā me.aar bhī daulat se hai

itnī sastī ho ga.ī dastār-o-dānā.ī ki bas

haiñ ba-zāhir sab siyāsat-dāñ vatan ke ḳhair-ḳhvāh

aur ba-bātin is qadar daulat ke shaidā.ī ki bas

jism par 'nashtar' koī bhī suiT fiT aatā nahīñ

ho ga.ī hai toñd kī kuchh aisī golā.ī ki bas

us ne thane mein rapaT kuchh aisi likhwai ki bas

phir police ne ki meri aisi pazirai ki bas

ye police wale kisi ke bhi sage hote nahin

in ko rishwat se mile hai wo tawanai ki bas

naukri mil jae chahe salary thoDi ho kam

han magar upar se wo income ho baalai ki bas

main ne begam se kaha honge ye bachche kab talak

boli jab tak apne munh se kah na de dai ki bas

aaj-kal kirdar ka mear bhi daulat se hai

itni sasti ho gai dastar-o-danai ki bas

hain ba-zahir sab siyasat-dan watan ke KHair-KHwah

aur ba-baatin is qadar daulat ke shaidai ki bas

jism par 'nashtar' koi bhi suiT fiT aata nahin

ho gai hai tond ki kuchh aisi golai ki bas