kursi-e-sadarat

kursī-e-sadārat par jo bhī shaḳhs baiThā ho

us pe kyā guzartī hai kuchh batā nahīñ saktā

zabt kar ke baiThegā iḳhtitām hone tak

koī bhī taqāzā ho uTh ke jā nahīñ saktā

rok kar hī rakkhegā apnā haath uThne se

jis qadar bhī khujlī ho sar khuja nahīñ saktā

so ga.e dhaḌalle se sāma’īn sīToñ par

niiñd kī parī ko ye paas lā nahīñ saktā

nazr-e-gosh honī haiñ har tarah kī taqrīreñ

koī kuchh bhī kah jaa.e tilmilā nahīñ saktā

sāmne jo baiThe hoñ kuchh hasīn se chehre

shān-e-be-niyāzī se muskurā nahīñ saktā

ho ga.ī kamar sīdhī concrete kī mānind

le ke ek añgḌā.ī chain pā nahīñ saktā

jis kā jab bhī jī chāhe uTh ke vo chalā jaa.e

ye nasīb kā maarā uTh ke jā nahīñ saktā

soch kar jo aayā thā ḳhutba-e-sadārat meñ

ho ga.iiñ vo sab bāteñ ye batā nahīñ saktā

kursi-e-sadarat par jo bhi shaKHs baiTha ho

us pe kya guzarti hai kuchh bata nahin sakta

zabt kar ke baiThega iKHtitam hone tak

koi bhi taqaza ho uTh ke ja nahin sakta

rok kar hi rakkhega apna hath uThne se

jis qadar bhi khujli ho sar khuja nahin sakta

so gae dhaDalle se sama’in siTon par

nind ki pari ko ye pas la nahin sakta

nazr-e-gosh honi hain har tarah ki taqriren

koi kuchh bhi kah jae tilmila nahin sakta

samne jo baiThe hon kuchh hasin se chehre

shan-e-be-niyazi se muskura nahin sakta

ho gai kamar sidhi concrete ki manind

le ke ek angDai chain pa nahin sakta

jis ka jab bhi ji chahe uTh ke wo chala jae

ye nasib ka mara uTh ke ja nahin sakta

soch kar jo aaya tha KHutba-e-sadarat mein

ho gain wo sab baaten ye bata nahin sakta