kya KHabar thi inqilab-e-asman ho jaega

kyā ḳhabar thī inqilāb-e-āsmāñ ho jā.egā

qorma qaliya nasīb-e-ahmaqāñ ho jā.egā

zulmat-e-bātil ke dāman meñ chhapegā nūr-e-haq

daal kī āġhosh meñ qiima nihāñ ho jā.egā

cake biscuit khā.eñge ullū ke paTThe rāt-din

aur sharīfoñ ke liye aaTā garāñ ho jā.egā

control us ke lab-e-shīrīñ pe gar yuuñ hī rahā

khānd kā sharbat nasīb-e-dushmanāñ ho jā.egā

ai bhune tītar na Dar bāvarchiyoñ kī qaid se

peT merā terī ḳhātir āshiyāñ ho jā.egā

ai sikandar murġh kā hai shorbā āb-e-hayāt

ḳhizr bhī us ko agar pī le javāñ ho jā.egā

jab ye kahtā huuñ ki kuchh sāmān-e-dāvat kījiye

vo ye kah kar Taal dete haiñ ki haañ ho jā.egā

kya KHabar thi inqilab-e-asman ho jaega

qorma qaliya nasib-e-ahmaqan ho jaega

zulmat-e-baatil ke daman mein chhapega nur-e-haq

dal ki aaghosh mein qima nihan ho jaega

cake biscuit khaenge ullu ke paTThe raat-din

aur sharifon ke liye aaTa garan ho jaega

control us ke lab-e-shirin pe gar yun hi raha

khand ka sharbat nasib-e-dushmanan ho jaega

ai bhune titar na Dar bawarchiyon ki qaid se

peT mera teri KHatir aashiyan ho jaega

ai sikandar murgh ka hai shorba aab-e-hayat

KHizr bhi us ko agar pi le jawan ho jaega

jab ye kahta hun ki kuchh saman-e-dawat kijiye

wo ye kah kar Tal dete hain ki han ho jaega