kya scene chal raha hai

āñkhoñ se nafratoñ kā laavā ubal rahā hai

har shaḳhs guftugū meñ sho'le ugal rahā hai

tahzīb kī hadoñ se bāhar nikal rahā hai

lagtā hai jaise koī dil ko masal rahā hai

kyā scene chal rahā hai

tūfān-e-bad-tamīzī jugteñ haiñ gāliyāñ haiñ

vo desk baj rahe haiñ nā're haiñ tāliyāñ haiñ

thuuk uḌ rahī hai muñh se chehroñ pe lāliyāñ haiñ

dekho fazāoñ meñ vo juutā uchhal rahā hai

kyā scene chal rahā hai

ik dūsre pe ghaTiyā ilzām dhar rahe haiñ

pagḌī uchhālne meñ had se guzar rahe haiñ

badnām ho ke apnā kyā naam kar rahe haiñ

jo zī-shu’ūr hai vo bas haath mal rahā hai

kyā scene chal rahā hai

kursī kisī ne pheñkī maarā kisī ne dhakkā

is ne lagāyā chaukā us ne lagāyā chhakkā

aivān meñ hai jaarī har samt aT-khaḌakkā

jamhūriyat kā paudā yuuñ phūl-phal rahā hai

kyā scene chal rahā hai

hotī hai pārTī ke hukmoñ pe jī-huzūrī

qaumī mafād un ko lagtā nahīñ zarūrī

aa kar assembliyoñ meñ karte haiñ niiñd puurī

ḳhvāboñ kī chāshnī se leader machal rahā hai

kyā scene chal rahā hai

majrūh gar ho un kā thoḌā sā haq kahīñ pe

baḌhtā hai un kā b.p paḌte haiñ bal jabīñ pe

paañv paTaḳh rahe haiñ nafrat se ye zamīñ pe

zahrīlī guftugū se aivān jal rahā hai

kyā scene chal rahā hai

kānoñ meñ paḌ rahī haiñ bāteñ tijāratoñ kī

ummīdvāriyāñ haiñ tigḌī vazāratoñ kī

buniyād bas yahī hai saarī sharāratoñ kī

offer kā lafz sun kar patthar pighal rahā hai

kyā scene chal rahā hai

jo aurteñ haiñ un kī matching bahut hai pyārī

aatī haiñ parlour se saj-dhaj ke roz saarī

fashion kā competition aivān meñ hai jaarī

dil kitne memberoñ kā un par phisal rahā hai

kyā scene chal rahā hai

auroñ ke vāste vo qānūn kyā banā.eñ

jo ḳhud hī zābtoñ kī haiñ dhajjiyāñ uḌā.eñ

qaumī mafād un ko ham yaad kyā dilā.eñ

jis ko kaheñ ujālā zulmat meñ Dhal rahā hai

kyā scene chal rahā hai

aankhon se nafraton ka lawa ubal raha hai

har shaKHs guftugu mein sho'le ugal raha hai

tahzib ki hadon se bahar nikal raha hai

lagta hai jaise koi dil ko masal raha hai

kya scene chal raha hai

tufan-e-bad-tamizi jugten hain galiyan hain

wo desk baj rahe hain na're hain taliyan hain

thuk uD rahi hai munh se chehron pe laliyan hain

dekho fazaon mein wo juta uchhal raha hai

kya scene chal raha hai

ek dusre pe ghaTiya ilzam dhar rahe hain

pagDi uchhaalne mein had se guzar rahe hain

badnam ho ke apna kya nam kar rahe hain

jo zi-shu’ur hai wo bas hath mal raha hai

kya scene chal raha hai

kursi kisi ne phenki mara kisi ne dhakka

is ne lagaya chauka us ne lagaya chhakka

aiwan mein hai jari har samt aT-khaDakka

jamhuriyat ka pauda yun phul-phal raha hai

kya scene chal raha hai

hoti hai parTi ke hukmon pe ji-huzuri

qaumi mafad un ko lagta nahin zaruri

aa kar assembliyon mein karte hain nind puri

KHwabon ki chashni se leader machal raha hai

kya scene chal raha hai

majruh gar ho un ka thoDa sa haq kahin pe

baDhta hai un ka bp paDte hain bal jabin pe

panw paTaKH rahe hain nafrat se ye zamin pe

zahrili guftugu se aiwan jal raha hai

kya scene chal raha hai

kanon mein paD rahi hain baaten tijaraton ki

ummidwariyan hain tigDi wazaraton ki

buniyaad bas yahi hai sari shararaton ki

offer ka lafz sun kar patthar pighal raha hai

kya scene chal raha hai

jo aurten hain un ki matching bahut hai pyari

aati hain parlour se saj-dhaj ke roz sari

fashion ka competition aiwan mein hai jari

dil kitne memberon ka un par phisal raha hai

kya scene chal raha hai

auron ke waste wo qanun kya banaen

jo KHud hi zabton ki hain dhajjiyan uDaen

qaumi mafad un ko hum yaad kya dilaen

jis ko kahen ujala zulmat mein Dhal raha hai

kya scene chal raha hai