lag gae hain phone lagne mein jo pachchis sal

lag ga.e haiñ phone lagne meñ jo pachchīs saal

is ḳhabar se kyuuñ huā paidā diloñ meñ ishti.āl

aadmī allāh kā shākir rahe har haal meñ

ba.az paudoñ par samar aatā hai sau sau saal meñ

shukr kī jā hai huī shāḳh-e-tamannā bār-āvar

der se aayā magar aayā to Daalī par samar

mohtasib aalā kī koshish qābil-e-tahsīn hai

phone kā lagnā kamāl-e-adl hai aa.iin hai

is kā ġham kyā kyuuñ lage is kaam meñ pachchīs saal

in dafātir meñ nahīñ hai ye koī pahlī misāl

lag gayā is kaam meñ Time to kyuuñ hai barhamī?

shukr adā kiije ki zinda rah gayā ye aadmī

mahkama T-&-T kā is ko Tahlātā rahā

phir bhī ye insān apne dil ko bahlātā rahā

hausla meñ vāqa.ī vo shaḳhs rakhtā hai kamāl

mubtalā jo āzmā.ish meñ rahā pachchīs saal

āḳhir ik din ḳhatm ye lambī kahānī ho ga.ī

mohtasib aalā kī is par mehrbānī ho ga.ī

shaḳhs-e-mazkūra na badlā aur is daurān meñ

jaane kitne daur badle apne pākistān meñ

jaane kitnī baar badlā rañg-e-dau-e-iqtadār

ho ga.iiñ tabdīl sarkāreñ yahāñ kitnī hī baar

bistar-e-sarkār kitnī baar bañdh bañdh kar khulā

ek ne bistar lapeTā ek kā bistar khulā

surḳhiyāñ badlīñ musalsal shauq ke mazmūn kī

rah ga.ī qaa.em magar darḳhvāst telephone kī

itne saal is mulk meñ kab ek sā Time rahā

laal fiita phir bhī apnī vaz.a par qaa.em rahā

daad do T-&-T vāloñ kī rāh-e-rāst ko

itne arse daabe rakhā sirf ik darḳhvāst ko

ye salīqa sirf T-&-T ko hai maula kī den

ek file ko kiyā itne baras tak maintain

ḳhairiyat guzrī kahīñ ġhā.eb na file ho ga.ī

aur kisī afsar kī bīnā.ī na zaa.il ho ga.ī

daad do us ko bhī jo is vaqt tak zinda rahā

jis ko har din intizār-e-sub.h-e-ā.inda rahā

naujavānī meñ jo ik darḳhvāst dī thī phone kī

ab huī manzūr jab kam hai harārat ḳhuun kī

shukr adā kiije huī to ḳhatm shām-e-intizār

is kā kyā shikva ki būḌhā ho gayā ummīd-vār

lag gayā phone aa ga.ī saa.at mubārakbād kī

baap kī arzī se qismat khul ga.ī aulād kī

saare ghar vaale piyeñge ghar meñ jab jaam aa.egā

phone vālid kā sahī aulād ke kaam aa.egā

lag gae hain phone lagne mein jo pachchis sal

is KHabar se kyun hua paida dilon mein ishtial

aadmi allah ka shakir rahe har haal mein

baz paudon par samar aata hai sau sau sal mein

shukr ki ja hai hui shaKH-e-tamanna bar-awar

der se aaya magar aaya to Dali par samar

mohtasib aala ki koshish qabil-e-tahsin hai

phone ka lagna kamal-e-adl hai aain hai

is ka gham kya kyun lage is kaam mein pachchis sal

in dafatir mein nahin hai ye koi pahli misal

lag gaya is kaam mein Time to kyun hai barhami?

shukr ada kije ki zinda rah gaya ye aadmi

mahkama T-&-T ka is ko Tahlata raha

phir bhi ye insan apne dil ko bahlata raha

hausla mein waqai wo shaKHs rakhta hai kamal

mubtala jo aazmaish mein raha pachchis sal

aaKHir ek din KHatm ye lambi kahani ho gai

mohtasib aala ki is par mehrbani ho gai

shaKHs-e-mazkura na badla aur is dauran mein

jaane kitne daur badle apne pakistan mein

jaane kitni bar badla rang-e-dau-e-iqtadar

ho gain tabdil sarkaren yahan kitni hi bar

bistar-e-sarkar kitni bar bandh bandh kar khula

ek ne bistar lapeTa ek ka bistar khula

surKHiyan badlin musalsal shauq ke mazmun ki

rah gai qaem magar darKHwast telephone ki

itne sal is mulk mein kab ek sa Time raha

lal fita phir bhi apni waza par qaem raha

dad do T-&-T walon ki rah-e-rast ko

itne arse dabe rakha sirf ek darKHwast ko

ye saliqa sirf T-&-T ko hai maula ki den

ek file ko kiya itne baras tak maintain

KHairiyat guzri kahin ghaeb na file ho gai

aur kisi afsar ki binai na zail ho gai

dad do us ko bhi jo is waqt tak zinda raha

jis ko har din intizar-e-subh-e-ainda raha

naujawani mein jo ek darKHwast di thi phone ki

ab hui manzur jab kam hai hararat KHun ki

shukr ada kije hui to KHatm sham-e-intizar

is ka kya shikwa ki buDha ho gaya ummid-war

lag gaya phone aa gai saat mubarakbaad ki

bap ki arzi se qismat khul gai aulad ki

sare ghar wale piyenge ghar mein jab jam aaega

phone walid ka sahi aulad ke kaam aaega