laila-e-crruption

aa.ī hai mire shahar meñ ik shoḳh hasīna

sarshār javānī hai ki sāvan kā mahīna

ra.anā.ī ke tevar haiñ ki tūfāñ kā qarīna

ik mahshar-e-jazbāt hai zālim kī javānī

mastāna adā.eñ haiñ ki dariyā kī ravānī

har muñh meñ bhar aatā hai jise dekh ke paanī

shoḳhī hai ki barsāt kī ganghor ghaTā.eñ

yā bazm-e-ḳharābāt kī maḳhmūr havā.eñ

yā vādī-e-kashmīr kī mas.hūr fazā.eñ

har shaḳhs ko jām-e-mai-e-dīdār pilā kar

har dil meñ charāġh apnī tamannā kā jalā kar

har ruuh meñ vāraftagī-e-shauq baḌhā kar

yuuñ chheḌ diyā us ne mohabbat kā tarāna

ik aan meñ tasḳhīr huā saarā zamāna

ushshāq bhulā baiThe zuleḳhā kā fasāna

vaise to phañsāne meñ vo mushtāq baḌī hai

har shaḳhs pe har dil pe nazar us kī gaḌī hai

jī-jān se lekin vo dafātir pe paḌī hai

sarkār ke daftar kā assistant bechāra

Takrā gayā us shoḳh kī nazroñ se qazā rā

aur farz kī baazī meñ barī tarah se haarā

faa.ez haiñ magar ohda-e-ālī pe jo afsar

zālim kī mohabbat meñ hue aape se bāhar

haal un ke dil-e-zār kā har dil se hai abtar

us dushman-e-īmāñ ne kisī ko bhī na chhoḌā

jo is ke muqābil the ġhurūr un kā bhī toḌā

dil apnī taraf qaum ke leader kā bhī moḌā

jo desh ke sevak the ahinsā ke pujārī

ḳhud un se hasīna ne kahā maiñ huuñ tumhārī

aur un pe bhī ulfat kā junūñ ho gayā taarī

ab desh kī sevā kī bhalā kyā hai zarūrat

ab vaqt kahāñ hai jo kareñ qaum kī ḳhidmat

ab vo haiñ aur us shoḳh kī āġhosh-e-mohabbat

aai hai mere shahar mein ek shoKH hasina

sarshaar jawani hai ki sawan ka mahina

ranai ke tewar hain ki tufan ka qarina

ek mahshar-e-jazbaat hai zalim ki jawani

mastana adaen hain ki dariya ki rawani

har munh mein bhar aata hai jise dekh ke pani

shoKHi hai ki barsat ki ganghor ghaTaen

ya bazm-e-KHarabaat ki maKHmur hawaen

ya wadi-e-kashmir ki mashur fazaen

har shaKHs ko jam-e-mai-e-didar pila kar

har dil mein charagh apni tamanna ka jala kar

har ruh mein waraftagi-e-shauq baDha kar

yun chheD diya us ne mohabbat ka tarana

ek aan mein tasKHir hua sara zamana

ushshaq bhula baiThe zuleKHa ka fasana

waise to phansane mein wo mushtaq baDi hai

har shaKHs pe har dil pe nazar us ki gaDi hai

ji-jaan se lekin wo dafatir pe paDi hai

sarkar ke daftar ka assistant bechaara

Takra gaya us shoKH ki nazron se qaza ra

aur farz ki bazi mein bari tarah se haara

faez hain magar ohda-e-ali pe jo afsar

zalim ki mohabbat mein hue aape se bahar

haal un ke dil-e-zar ka har dil se hai abtar

us dushman-e-iman ne kisi ko bhi na chhoDa

jo is ke muqabil the ghurur un ka bhi toDa

dil apni taraf qaum ke leader ka bhi moDa

jo desh ke sewak the ahinsa ke pujari

KHud un se hasina ne kaha main hun tumhaari

aur un pe bhi ulfat ka junun ho gaya tari

ab desh ki sewa ki bhala kya hai zarurat

ab waqt kahan hai jo karen qaum ki KHidmat

ab wo hain aur us shoKH ki aaghosh-e-mohabbat