machchharon se pareshan ho kar

āj-kal tum se jo rahtī hai mulāqāt kī raat

ya.anī mehmān rahā karte ho tum raat kī raat

aaj itnā batā do ki hai jazbāt kī raat

ḳhud ko tum din ke ujāle se bachāte kyuuñ ho

ye to batlāo ki tum raat meñ aate kyuuñ ho

tum se merī to koī ranjish-e-bejā bhī nahīñ

tum ko mahsūs kiyā hai kabhī dekhā bhī nahīñ

tum se milne kī mujhe koī tamannā bhī nahīñ

ḳhvāh-maḳhvāh mujh se ta.alluq ko baḌhāte kyuuñ ho

ye to batlāo ki tum raat meñ aate kyuuñ ho

mere kamre meñ agar koī sajāvaT bhī nahīñ

gandagī bikhrī ho utnī to girāvaT bhī nahīñ

pakke rāgoñ se mujhe koī lagāvaT bhī nahīñ

bhairvīñ aa ke mire kaan meñ gaate kyuuñ ho

ye to batlāo ki tum raat meñ aate kyuuñ ho

kisī halvā.ī kī bhaTTī pe bhī jā kar dekho

apnā ye raag vahāñ bhī to sunā kar dekho

sūrmā ho to kabhī din meñ bhī aa kar dekho

tum añdhere meñ sadā tiir chalāte kyuuñ ho

ye to batlāo ki tum raat meñ aate kyuuñ ho

sūkhe pattoñ maiñ jalātā nahīñ apne ghar meñ

chemical bhī koī laatā nahīñ apne ghar meñ

maiñ kisī ko bhī satātā nahīñ apne ghar meñ

tum bhī be-vaj.h mire yaar satāte kyuuñ ho

ye to batlāo ki tum raat meñ aate kyuuñ ho

kashtī-e-vasl shab-e-tār meñ khe sakte the

zaḳhm dete hue marham bhī to de sakte the

bosa lenā thā to āhista bhī le sakte the

is qadar shiddat-e-jazbāt dikhāte kyuuñ ho

ye to batlāo ki tum raat meñ aate kyuuñ ho

tum se bachhḌā bhī to kyā ḳhaak qarār aa.egā

sub.h hogī to mujhe jaaḌā buḳhār aa.egā

mixture aa.egā to zāhir hai udhār aa.egā

muflisī meñ ye nayā ḳharch baḌhāte kyuuñ ho

ye to batlāo ki tum raat meñ aate kyuuñ ho

laakh fariyād kī par ek na tum ne maanī

tum na baaz aa.e bahut jism pe chādar taanī

ab to kuchh din se lagā letā huuñ machchhar-dānī

shaam hī se ye havālāt dikhāte kyuuñ ho

ye to batlāo ki tum raat meñ aate kyuuñ

tum ko DhūñDā na ho maiñ ne kabhī aisā bhī nahīñ

tum pahuñchte ho jahāñ haath pahuñchtā hai vahīñ

kyā karūñ maiñ ki mire haath bhī aate ho kahīñ

varna ye pūchhtā tum bhaag ke jaate kyuuñ ho

ye to batlāo ki tum raat meñ aate kyuuñ ho

aa.egā vaqt kā tūfān to pachhtāoge

sūkhe pattoñ kī tarah tum bhī bikhar jāoge

tum bhī kyā garm havāoñ meñ Thahar pāoge

aur kuchh roz ho tum shor machāte kyuuñ ho

ye to batlāo ki tum raat meñ aate kyuuñ ho

aaj-kal tum se jo rahti hai mulaqat ki raat

yani mehman raha karte ho tum raat ki raat

aaj itna bata do ki hai jazbaat ki raat

KHud ko tum din ke ujale se bachate kyun ho

ye to batlao ki tum raat mein aate kyun ho

tum se meri to koi ranjish-e-beja bhi nahin

tum ko mahsus kiya hai kabhi dekha bhi nahin

tum se milne ki mujhe koi tamanna bhi nahin

KHwah-maKHwah mujh se talluq ko baDhate kyun ho

ye to batlao ki tum raat mein aate kyun ho

mere kamre mein agar koi sajawaT bhi nahin

gandagi bikhri ho utni to girawaT bhi nahin

pakke ragon se mujhe koi lagawaT bhi nahin

bhairwin aa ke mere kan mein gate kyun ho

ye to batlao ki tum raat mein aate kyun ho

kisi halwai ki bhaTTi pe bhi ja kar dekho

apna ye rag wahan bhi to suna kar dekho

surma ho to kabhi din mein bhi aa kar dekho

tum andhere mein sada tir chalate kyun ho

ye to batlao ki tum raat mein aate kyun ho

sukhe patton main jalata nahin apne ghar mein

chemical bhi koi lata nahin apne ghar mein

main kisi ko bhi satata nahin apne ghar mein

tum bhi be-wajh mere yar satate kyun ho

ye to batlao ki tum raat mein aate kyun ho

kashti-e-wasl shab-e-tar mein khe sakte the

zaKHm dete hue marham bhi to de sakte the

bosa lena tha to aahista bhi le sakte the

is qadar shiddat-e-jazbaat dikhate kyun ho

ye to batlao ki tum raat mein aate kyun ho

tum se bachhDa bhi to kya KHak qarar aaega

subh hogi to mujhe jaDa buKHar aaega

mixture aaega to zahir hai udhaar aaega

muflisi mein ye naya KHarch baDhate kyun ho

ye to batlao ki tum raat mein aate kyun ho

lakh fariyaad ki par ek na tum ne mani

tum na baz aae bahut jism pe chadar tani

ab to kuchh din se laga leta hun machchhar-dani

sham hi se ye hawalat dikhate kyun ho

ye to batlao ki tum raat mein aate kyun

tum ko DhunDa na ho main ne kabhi aisa bhi nahin

tum pahunchte ho jahan hath pahunchta hai wahin

kya karun main ki mere hath bhi aate ho kahin

warna ye puchhta tum bhag ke jate kyun ho

ye to batlao ki tum raat mein aate kyun ho

aaega waqt ka tufan to pachhtaoge

sukhe patton ki tarah tum bhi bikhar jaoge

tum bhi kya garm hawaon mein Thahar paoge

aur kuchh roz ho tum shor machate kyun ho

ye to batlao ki tum raat mein aate kyun ho