mujhko hai marghub mai zahid ko shauq-e-chae hai

mujh ko hai marġhūb mai zāhid ko shauq-e-chā.e hai

apnā apnā shaġhl hai aur apnī apnī raa.e hai

hai matā-e-husn-e-lā-vāris se pur lawrence-bāġh

lauTne kī hai kahāñ ye lūTne kī jaa.e hai

sāmne aġhyār ke be-parda aur mujh se hijāb

gulguloñ se hai use parhez aur guḌ khaa.e hai

sard-mehrī se butoñ kī ho gayā hai dil bhī sard

shukriya adnā sweater kā jo dil garmā.e hai

shukr hai vo hasb-e-va.ada nīm-shab aa hī ga.e

muzhda-bād ai dil ki koī call-bell khaḌkā.e hai

naqsh-e-pā-e-yār ko chūmūñ to chūmūñ kis tarah

ho burā patlūn kā mujh se na baiThā jaa.e hai

marg-e-'laq-laq' par butoñ ke ghar meñ mātam paḌ gayā

haa.e he-he haa.e he-he haa.e he-he haa.e hai

mujh ko hai marghub mai zahid ko shauq-e-chae hai

apna apna shaghl hai aur apni apni rae hai

hai mata-e-husn-e-la-waris se pur lawrence-bagh

lauTne ki hai kahan ye luTne ki jae hai

samne aghyar ke be-parda aur mujh se hijab

gulgulon se hai use parhez aur guD khae hai

sard-mehri se buton ki ho gaya hai dil bhi sard

shukriya adna sweater ka jo dil garmae hai

shukr hai wo hasb-e-wada nim-shab aa hi gae

muzhda-baad ai dil ki koi call-bell khaDkae hai

naqsh-e-pa-e-yar ko chumun to chumun kis tarah

ho bura patlun ka mujh se na baiTha jae hai

marg-e-'laq-laq' par buton ke ghar mein matam paD gaya

hae he-he hae he-he hae he-he hae hai