nanhe ki amman se

raunaq-e-ḳhāna kahūñ tujh ko maiñ yā ḳhāna-ḳharāb

ai sharīk-e-zindagī ai zindagī-bhar kā 'azāb

maiñ samajhtā thā tire aane se ghar ban jā.egā

kyā ḳhabar thī terā aanā dard-e-sar ban jā.egā

maiñ tujhe laayā thā ghar apnā basāne ke liye

tū magar aa.ī hai bas bārah bajāne ke liye

har taraf bikhre paḌe haiñ ghar meñ go laḳht-e-jigar

terī supply magar ab bhī hai puure zor par

mujh ko nā-bīnā kiye dete haiñ go nūr-e-nazar

ghar meñ aane se nahīñ rukte magar shams-o-qamar

kuchh asāsa apnā rakh mahfūz kal ke vāste

ek do rahne bhī de mauqa’-mahal ke vāste

har galī meñ board ḳhush-hālī ke aate haiñ nazar

ek ammāñ ek abbā ek duḳhtar ik pisar

apne bachche dekh nazreñ apne mustaqbil pe Daal

ghar meñ kar mansūba-bandī chhoḌ ‘uqbā kā ḳhayāl

raunaq-e-KHana kahun tujh ko main ya KHana-KHarab

ai sharik-e-zindagi ai zindagi-bhar ka 'azab

main samajhta tha tere aane se ghar ban jaega

kya KHabar thi tera aana dard-e-sar ban jaega

main tujhe laya tha ghar apna basane ke liye

tu magar aai hai bas barah bajaane ke liye

har taraf bikhre paDe hain ghar mein go laKHt-e-jigar

teri supply magar ab bhi hai pure zor par

mujh ko na-bina kiye dete hain go nur-e-nazar

ghar mein aane se nahin rukte magar shams-o-qamar

kuchh asasa apna rakh mahfuz kal ke waste

ek do rahne bhi de mauqa’-mahal ke waste

har gali mein board KHush-haali ke aate hain nazar

ek amman ek abba ek duKHtar ek pisar

apne bachche dekh nazren apne mustaqbil pe Dal

ghar mein kar mansuba-bandi chhoD ‘uqba ka KHayal