nasri nazm

nasr abbā nazm amaañ donoñ ko inkār hai

ye jo nasrī nazm hai ye kis kī paidā-vār hai

sirf laffāzī pe mabnī hai ye tajrīdī kalām

jis meñ anqā haiñ ma.ānī lafz parda-dār hai

nasr hai gar nasr to vo nazm ho saktī nahīñ

nazm jo ho nasr kī mānind vo be-kār hai

qāfiye kī koī pābandī na hai qaid-e-radīf

be-dar-o-dīvār kā ye ghar bhī kyā purkār hai

bahr se āzād qaid-e-vazan se hai be-niyāz

vaah kyā mother pidar āzād ye dildār hai

martabe meñ 'mīr' o 'momin' se hai har koī buland

in meñ har be-bahr ġhālib se baḌā fankār hai

jis ke chamche jitne zyāda hoñ vo utnā hī aziim

aaj kal misrā uThānā ek kārobār hai

daad sirf apno ko dete haiñ giroh-andar-giroh

un ke Tole se jo bāhar ho gayā murdār hai

ban gayā ustād-o-allāma yahāñ har be-shu.ūr

kor-chashm ahl-e-nazar hone kā dāvedār hai

shā.irī juz-shā.irī hai hai zarā mehnat-talab

aur mehnat hī vo shai hai jis se un ko aar hai

pop-music ke liye mauzūñ hai nasrī shā.irī

har rivāyat se baġhāvat kī ye dāvedār hai

tab-e-mauzūñ gar na baḳhshī ho ḳhudā ne aap ko

shā.irī kyuuñ kiije āḳhir kyā ḳhudā kī maar hai

daad denā aisī nazmoñ ko baḌī be-dād hai

jo na samjhā aur kahe samjhā baḌā makkār hai

nasr abba nazm aman donon ko inkar hai

ye jo nasri nazm hai ye kis ki paida-war hai

sirf laffazi pe mabni hai ye tajridi kalam

jis mein anqa hain maani lafz parda-dar hai

nasr hai gar nasr to wo nazm ho sakti nahin

nazm jo ho nasr ki manind wo be-kar hai

qafiye ki koi pabandi na hai qaid-e-radif

be-dar-o-diwar ka ye ghar bhi kya purkar hai

bahr se aazad qaid-e-wazan se hai be-niyaz

wah kya mother pidar aazad ye dildar hai

martabe mein 'mir' o 'momin' se hai har koi buland

in mein har be-bahr ghaalib se baDa fankar hai

jis ke chamche jitne zyaada hon wo utna hi azim

aaj kal misra uThana ek karobar hai

dad sirf apno ko dete hain giroh-andar-giroh

un ke Tole se jo bahar ho gaya murdar hai

ban gaya ustad-o-allama yahan har be-shuur

kor-chashm ahl-e-nazar hone ka dawedar hai

shairi juz-shairi hai hai zara mehnat-talab

aur mehnat hi wo shai hai jis se un ko aar hai

pop-music ke liye mauzun hai nasri shairi

har riwayat se baghawat ki ye dawedar hai

tab-e-mauzun gar na baKHshi ho KHuda ne aap ko

shairi kyun kije aaKHir kya KHuda ki mar hai

dad dena aisi nazmon ko baDi be-dad hai

jo na samjha aur kahe samjha baDa makkar hai