nila gharara

bas shā.era mushā.ere meñ kāmyāb thī

aur shā.iroñ kī dosto! miTTī ḳharāb thī

us vaqt sochte the bichāre 'bashīr-badr'

kaise karā.eñ dostoñ se ham ġhazal kī qadr

'sāġhar' ġhazal samet saroñ se guzar ga.e

hangām-e-husn-o-ishq meñ shīshe bikhar ga.e

nākām ho ke rah ga.iiñ nazmeñ 'nadīm' kī

aur dīdanī thī dosto! sūrat 'vasīm' kī

pūchhā kisī ne mujh se ki 'anvar' kahāñ ga.e

maiñ ne kahā ki le ke vo kambal makāñ ga.e

gumnāmiyoñ meñ ism-e-girāmī kā kaam kyā

bad-nazmiyoñ meñ hazrat-e-'nazmī' kā kaam kyā

jantā guzar ga.ī thī vahāñ apne hosh se

kartī thī maañg giit kī 'rif.at-sarosh' se

har samt se thī maañg jo husn-o-jamāl kī

kuchh aur TeḌhī ho ga.ī sūrat 'hilāl' kī

maidān-e-shā.erī meñ har ik top fail thī

vo chal rahe the haath meñ jin ke ġhulail thī

'manzūr' bhaa.ī zor se ye kah ke pukāre

bas āḳhirī ye tiir hai tarkash meñ hamāre

ya.anī 'ḳhumār' jo ki shahanshāh-e-ġhazal hai

mumtāz shā.erī kā hasīñ taaj mahal hai

ho jā.iye ḳhamosh zarā der ke liye

aa.ī sadā ke niile ġharāre ko bhejiye

'manzūr' bhaa.ī aur bhī masrūr ho ga.e

aur shā.era ko laane pe majbūr ho ga.e

chheḌī ġhazal jo zulf ko chehre se haTā kar

de maarā puurī bazm ko do haath uThā kar

bolī baḌī adā se javānoñ kī nazr hai

matl.a hamārā tishna-dahānoñ kī nazr hai

maiñ ne kahā ġhazal kī ye achchhī dalīl hai

jo aap pe qurbān na ho vo zalīl hai

bas shaera mushaere mein kaamyab thi

aur shairon ki dosto! miTTi KHarab thi

us waqt sochte the bichaare 'bashir-badr'

kaise karaen doston se hum ghazal ki qadr

'saghar' ghazal samet saron se guzar gae

hangam-e-husn-o-ishq mein shishe bikhar gae

nakaam ho ke rah gain nazmen 'nadim' ki

aur didani thi dosto! surat 'wasim' ki

puchha kisi ne mujh se ki 'anwar' kahan gae

main ne kaha ki le ke wo kambal makan gae

gumnamiyon mein ism-e-girami ka kaam kya

bad-nazmiyon mein hazrat-e-'nazmi' ka kaam kya

janta guzar gai thi wahan apne hosh se

karti thi mang git ki 'rifat-sarosh' se

har samt se thi mang jo husn-o-jamal ki

kuchh aur TeDhi ho gai surat 'hilal' ki

maidan-e-shaeri mein har ek top fail thi

wo chal rahe the hath mein jin ke ghulail thi

'manzur' bhai zor se ye kah ke pukare

bas aaKHiri ye tir hai tarkash mein hamare

yani 'KHumar' jo ki shahanshah-e-ghazal hai

mumtaz shaeri ka hasin taj mahal hai

ho jaiye KHamosh zara der ke liye

aai sada ke nile gharare ko bhejiye

'manzur' bhai aur bhi masrur ho gae

aur shaera ko lane pe majbur ho gae

chheDi ghazal jo zulf ko chehre se haTa kar

de mara puri bazm ko do hath uTha kar

boli baDi ada se jawanon ki nazr hai

matla hamara tishna-dahanon ki nazr hai

main ne kaha ghazal ki ye achchhi dalil hai

jo aap pe qurban na ho wo zalil hai