purane jute

gardish-e-aflāk ke maare hue juute tamām

ik saḌak ke moḌ par rakkhe the bā-sad-ehtimām

un pe TuuTe paḌ rahe the muflisān-e-ḳhās-o-ām

maiñ ne bhī gardan baḌhā ke pūchhe un meñ ik ke daam

bolā muddat-bād in jūtoñ kā ab uTThā hai paal

aur in jūtoñ meñ har juutā hai aap apnī misāl

ek juutā un meñ thā jo tajraboñ kā shāhkār

aur kisī bhāge hue añgrez kī thī yādgār

bolā maiñ is des meñ chaltā rahā huuñ bār-bār

hindū aur muslim haiñ ab tak mere afsūñ kā shikār

painT vāloñ meñ abhī tak merī vaq.at hai vahī

qadar-e-gauhar-shāh dānad yā ba-dāna-jauhrī

un meñ ik tagḌā sā juutā ek D.s.p kā thā

umr bhar jo be-gunāhoñ ke saroñ par thā chalā

kitnī kitnī rishvateñ sāhab ko thā khilvā chukā

jism go be jaan thā lekin tale kā thā kaḌā

maiñ ne das aane lagā.e is pe bolā o-saḳhī

saat pushtoñ ne tirī pahnā thā ye juutā kabhī

saindil ik barmī paḌī thī us jagah msatānā-vār

is tarah rakkhī huī thī jaise pattoñ meñ anaar

ye kisī college kī laḌkī kī rahī thī ġham-gusār

naujavāñ ushshāq ke jazbe the us ke zer-e-bār

bolā meñ ye aap kī Thokar meñ haiñ kyā ḳhāl-ḳhāl

bolī ye haiñ naujavāñ ushshāq kī chañdiyā ke baal

shaiḳh ghesū karke ik mochī se pahle sāz-bāz

umr meñ pahle-pahal masjid ga.e paḌhne namāz

darmiyāñ meñ toḌ kar ye apnī nīyat hīlā-sāz

jhaaḌ laa.e ek chappal jo thī be-had dil-navāz

ye javāñ chappal thī apne haal par vaañ nauha-ḳhvāñ

aur miyāñ ghesū kī thī īmān kī ratb-ul-lisāñ

gardish-e-aflak ke mare hue jute tamam

ek saDak ke moD par rakkhe the ba-sad-ehtimam

un pe TuTe paD rahe the muflisan-e-KHas-o-am

main ne bhi gardan baDha ke puchhe un mein ek ke dam

bola muddat-baad in juton ka ab uTTha hai pal

aur in juton mein har juta hai aap apni misal

ek juta un mein tha jo tajrabon ka shahkar

aur kisi bhage hue angrez ki thi yaadgar

bola main is des mein chalta raha hun bar-bar

hindu aur muslim hain ab tak mere afsun ka shikar

painT walon mein abhi tak meri waqat hai wahi

qadar-e-gauhar-shah danad ya ba-dana-jauhri

un mein ek tagDa sa juta ek Dsp ka tha

umr bhar jo be-gunahon ke saron par tha chala

kitni kitni rishwaten sahab ko tha khilwa chuka

jism go be jaan tha lekin tale ka tha kaDa

main ne das aane lagae is pe bola o-saKHi

sat pushton ne teri pahna tha ye juta kabhi

saindil ek barmi paDi thi us jagah msatana-war

is tarah rakkhi hui thi jaise patton mein anar

ye kisi college ki laDki ki rahi thi gham-gusar

naujawan ushshaq ke jazbe the us ke zer-e-bar

bola mein ye aap ki Thokar mein hain kya KHal-KHal

boli ye hain naujawan ushshaq ki chandiya ke baal

shaiKH ghesu karke ek mochi se pahle saz-baz

umr mein pahle-pahal masjid gae paDhne namaz

darmiyan mein toD kar ye apni niyat hila-saz

jhaD lae ek chappal jo thi be-had dil-nawaz

ye jawan chappal thi apne haal par wan nauha-KHwan

aur miyan ghesu ki thi iman ki ratb-ul-lisan