safar ho rail-gaDi ka to chhake chhuT jate hain

safar ho rail-gāḌī kā to chhake chhūT jaate haiñ

pasīne ke ghaḌe goyā saroñ par phuuT jaate haiñ

ticket lenā jo pahlā kaam hai aur saḳht mushkil hai

samajh liije ki ye apne safar kī pahlī manzil hai

reservation karānā hai to pahle ik qulī pakḌeñ

ḳhushāmad se manā liije qulī sāhab agar akḌeñ

bōking-office kā baabū aap kī āsān kar degā

vo mushkil hal karegā aur apnī fees le legā

reservation karā degā aur vo das-bīs le gā

kisī kī seat ho vo aap ko dilvā ke dam legā

magar pahle ye tai kar leñ ki vo kitnī raqam legā

hamesha yaad rakkheñ ye usūl-e-jāvedānī hai

ki station maqām-e-kūch hai aur dār-e-fānī hai

safar ho rail-gaDi ka to chhake chhuT jate hain

pasine ke ghaDe goya saron par phuT jate hain

ticket lena jo pahla kaam hai aur saKHt mushkil hai

samajh lije ki ye apne safar ki pahli manzil hai

reserwation karana hai to pahle ek quli pakDen

KHushamad se mana lije quli sahab agar akDen

booking-office ka babu aap ki aasan kar dega

wo mushkil hal karega aur apni fees le lega

reserwation kara dega aur wo das-bis le ga

kisi ki seat ho wo aap ko dilwa ke dam lega

magar pahle ye tai kar len ki wo kitni raqam lega

hamesha yaad rakkhen ye usul-e-jawedani hai

ki station maqam-e-kuch hai aur dar-e-fani hai