shaitan ka farman

uTTho mire mahbūb murīdoñ ko jagā do

fan-kāroñ ko iblīs kā paiġhām sunā do

jis mulk meñ yāroñ ko mayassar na ho wine

us mulk kā har ḳhosha-e-angūr jalā do

garmāo adīboñ kā lahū whiskey-o-rum se

shā.ir koī mil jaa.e to Tharrā hī pilā do

leader jo nazar aa.e to bolo ye adab se

taqrīr meñ tum garmi-e-whiskey se jilā do

paper ke editor se agar kaam ho lenā

chup-chāp se office meñ beer us ko pilā do

har bazm meñ angūr kī beTī ko bulāo

mullā se añdhere meñ gale us ko lagā do

shā.ir koī mahfil meñ agar pī ke na aa.e

vo paḌh na sake apnī ġhazal shor machā do

arbāb-e-tadabbur jo haiñ aulād hamārī

us ko mirā har falsafa-e-zīst sikhā do

ehsās-e-hamiyyat na rahe dil meñ kisī ke

petrol chhiḌak kar his-e-ġhairat ko jalā do

is shā.er-e-gustāḳh ko 'asrār'-e-suḳhan ko

is nazm kī taḳhlīq pe phāñsī kī sazā do

uTTho mere mahbub muridon ko jaga do

fan-karon ko iblis ka paigham suna do

jis mulk mein yaron ko mayassar na ho wine

us mulk ka har KHosha-e-angur jala do

garmao adibon ka lahu whiskey-o-rum se

shair koi mil jae to Tharra hi pila do

leader jo nazar aae to bolo ye adab se

taqrir mein tum garmi-e-whiskey se jila do

paper ke editor se agar kaam ho lena

chup-chap se office mein beer us ko pila do

har bazm mein angur ki beTi ko bulao

mulla se andhere mein gale us ko laga do

shair koi mahfil mein agar pi ke na aae

wo paDh na sake apni ghazal shor macha do

arbab-e-tadabbur jo hain aulad hamari

us ko mera har falsafa-e-zist sikha do

ehsas-e-hamiyyat na rahe dil mein kisi ke

petrol chhiDak kar his-e-ghairat ko jala do

is shaer-e-gustaKH ko 'asrar'-e-suKHan ko

is nazm ki taKHliq pe phansi ki saza do