tah-o-baala jahan ko kar rakkha hai apni udham se

tah-o-bālā jahāñ ko kar rakkhā hai apnī ūdham se

sivā is ke kaheñ ham kyā ḳhudā hī samjhe william se

bahār-e-germany ab koī dam meñ hotī hai āḳhir

nahīñ ye war is ke haq meñ kam wind-of-autumn se

jo maare jaane se bach bhī ga.e is jañg-e-europe meñ

vo be-shak bahre ho jā.eñge topoñ kī dhamā-dham se

huiiñ ta.alīm pā kar bībayāñ ab leDiyāñ ḳhāsī

badal Dāleñ na begam ko kyuuñ vo madam se

huiiñ āzād qaid-e-shar.a se ta.alīm ke sadqe

pakaḌ kar dast-e-nā-mahram na kyuuñ utreñ vo TamTam se

paḌe yā-rab kisī dev-e-jafā-jū se use paalā

uḌāyā jis ne photo us parī kā mere album se

maiñ gentleman huuñ māshūqa bhī miss mil ho yā miss hil

ġharaz hai zohra-ḳhānam se na kaam iqbāl-begam se

rahā un ke suroñ meñ gar yahī saudā raqābat kā

halāk ik din na kar Dāleñ kahīñ a.adā mujhe bam se

akelā maiñ sab a.adā kī ḳhabar lene ko kaafī huuñ

maiñ kyuuñ Darne lagā ai yaar un ke ultimatum se

bayāz apnī nahīñ paḌh sakte go zo.af-e-basārat se

sunāte haiñ ġhazal ham hāfize kī memorandum se

jo major jā.eza lene ko pahuñchā apne lashkar meñ

hue kaan us ke bahre har taraf ke shor-e-welcome se

tah-o-baala jahan ko kar rakkha hai apni udham se

siwa is ke kahen hum kya KHuda hi samjhe william se

bahaar-e-germany ab koi dam mein hoti hai aaKHir

nahin ye war is ke haq mein kam wind-of-autumn se

jo mare jaane se bach bhi gae is jang-e-europe mein

wo be-shak bahre ho jaenge topon ki dhama-dham se

huin talim pa kar bibayan ab leDiyan KHasi

badal Dalen na begam ko kyun wo madam se

huin aazad qaid-e-shara se talim ke sadqe

pakaD kar dast-e-na-mahram na kyun utren wo TamTam se

paDe ya-rab kisi dew-e-jafa-ju se use pala

uDaya jis ne photo us pari ka mere album se

main gentleman hun mashuqa bhi miss mil ho ya miss hil

gharaz hai zohra-KHanam se na kaam iqbaal-begam se

raha un ke suron mein gar yahi sauda raqabat ka

halak ek din na kar Dalen kahin aada mujhe bam se

akela main sab aada ki KHabar lene ko kafi hun

main kyun Darne laga ai yar un ke ultimatum se

bayaz apni nahin paDh sakte go zoaf-e-basarat se

sunate hain ghazal hum hafize ki memorandum se

jo major jaeza lene ko pahuncha apne lashkar mein

hue kan us ke bahre har taraf ke shor-e-welcome se