unki unchi ho gai dukan ab kya kijiye

un kī ūñchī ho ga.ī dūkān ab kyā kījiye

rah gayā phīkā magar pakvān ab kyā kījiye

vaah hippy-ism ne naqsha badal kar rakh diyā

ban ga.iiñ rizvāna bī rizvān ab kyā kījiye

un ko eḌī-dār sandle chāhiye aur is taraf

sar kī ābādī nahīñ gunjān ab kyā kījiye

maah kī hai āḳhirī tārīḳh aa dhamke haiñ aaj

un ke maike se ka.ī mehmān ab kyā kījiye

raddī aḳhbāroñ ko bechūñ yā ki sar ko phoḌ luuñ

ghar meñ khāne kā nahīñ sāmān ab kyā kījiye

shā'irī ko chhoḌ kar qavvāl hī ban jaa.eñ kyā

she’r-fahmī kā hai uf fuqdān ab kyā kījiye

jab se tīnoñ show cinema ghar ke ful rahne lage

masjideñ haiñ shahr kī vīrān ab kyā kījiye

farq kuchh baaqī nahīñ tazkīr aur tānīs kā

jins kī dushvār hai pahchān ab kyā kījiye

maiñ ne to ramzān rakkhā thā naveñ laḌke kā naam

aaj dasvāñ aa gayā qurbān ab kyā kījiye

bech kar biivī ke zevar qarz denā thā jinheñ

chal diye vo sū-e-qabristān ab kyā kījiye

karte the islāh ġhazloñ kī mirī piite the bhang

aaj un kā ho gayā chālān ab kyā kījiye

ek darjan 'āshiqoñ ko bāñdhnā hai thaan par

un kā chhoTā hai magar dālān ab kyā kījiye

nazm be-mā'nī sī ik likh lī ba-andāz-e-jadīd

jis kā miltā hī nahīñ 'unvān ab kyā kījiye

ghar meñ shā'ir ke milā choroñ ko jab kuchh bhī nahīñ

le ga.e 'jauhar' kā vo dīvān ab kyā kījiye

un ki unchi ho gai dukan ab kya kijiye

rah gaya phika magar pakwan ab kya kijiye

wah hippy-ism ne naqsha badal kar rakh diya

ban gain rizwana bi rizwan ab kya kijiye

un ko eDi-dar sandle chahiye aur is taraf

sar ki aabaadi nahin gunjaan ab kya kijiye

mah ki hai aaKHiri tariKH aa dhamke hain aaj

un ke maike se kai mehman ab kya kijiye

raddi aKHbaron ko bechun ya ki sar ko phoD lun

ghar mein khane ka nahin saman ab kya kijiye

sha'iri ko chhoD kar qawwal hi ban jaen kya

she’r-fahmi ka hai uf fuqdan ab kya kijiye

jab se tinon show cinema ghar ke ful rahne lage

masjiden hain shahr ki viran ab kya kijiye

farq kuchh baqi nahin tazkir aur tanis ka

jins ki dushwar hai pahchan ab kya kijiye

main ne to ramzan rakkha tha nawen laDke ka nam

aaj daswan aa gaya qurban ab kya kijiye

bech kar biwi ke zewar qarz dena tha jinhen

chal diye wo su-e-qabristan ab kya kijiye

karte the islah ghazlon ki meri pite the bhang

aaj un ka ho gaya chaalan ab kya kijiye

ek darjan 'ashiqon ko bandhna hai than par

un ka chhoTa hai magar dalan ab kya kijiye

nazm be-ma'ni si ek likh li ba-andaz-e-jadid

jis ka milta hi nahin 'unwan ab kya kijiye

ghar mein sha'ir ke mila choron ko jab kuchh bhi nahin

le gae 'jauhar' ka wo diwan ab kya kijiye