uncle zahid aur Khaala parwin

shurū' shurū' meñ un kī duniyā thī kitnī rangīn

jab vo ek se do hote haiñ aur phir do se tiin

is ke baa'd to chal jaatī hai jaise koī machine

chīḳh rahe haiñ ghar-bhar meñ nanhe nanhe shāhīn

sar piiTe ab uncle zāhid aur ḳhāla parvīn

sochte the ki ghar āñgan meñ khileñge bas do phuul

rang-birange kapḌe pahan ke jā.eñge schōl

anjāne meñ un ke pyaar ne pakḌā itnā tuul

jo kuchh thā rangīn vo sab kuchh ho gayā phir sangīn

sar piiTe ab uncle zāhid aur ḳhāla parvīn

das tārīḳh se pahle un kā baTvā hai vīrān

aaTe kā bohrān hai ghar meñ chīnī kā fuqdān

chhe sāloñ meñ kar baiThe haiñ ābādī gunjān

un ke ghar meñ chal nahīñ saktā ab koī aa.iin

sar piiTe ab uncle zāhid aur ḳhāla parvīn

ThanDā paḌ gayā kuchh hī sāloñ meñ donoñ kā josh

hangāmoñ ko kar ke paidā baiThe haiñ ḳhāmosh

apnā hī sab kiyā dharā hai deñ ab kis ko dosh

'ishq kā ye anjām bhī hogā aatā nahīñ yaqīn

sar piiTe ab uncle zāhid aur ḳhāla parvīn

ik din bahbūd-e-ābādī vaale milne aa.e

thoḌī der meñ un bachchoñ ne kartab vo dikhlā.e

dil hī dil meñ vo bechāre dekh ke phir ghabrā.e

ek hī ghar meñ apne mahkame kī itnī tauhīn

sar piiTe ab uncle zāhid aur ḳhāla parvīn

shuru' shuru' mein un ki duniya thi kitni rangin

jab wo ek se do hote hain aur phir do se tin

is ke ba'd to chal jati hai jaise koi machine

chiKH rahe hain ghar-bhar mein nanhe nanhe shahin

sar piTe ab uncle zahid aur KHala parwin

sochte the ki ghar aangan mein khilenge bas do phul

rang-birange kapDe pahan ke jaenge school

anjaane mein un ke pyar ne pakDa itna tul

jo kuchh tha rangin wo sab kuchh ho gaya phir sangin

sar piTe ab uncle zahid aur KHala parwin

das tariKH se pahle un ka baTwa hai viran

aaTe ka bohran hai ghar mein chini ka fuqdan

chhe salon mein kar baiThe hain aabaadi gunjaan

un ke ghar mein chal nahin sakta ab koi aain

sar piTe ab uncle zahid aur KHala parwin

ThanDa paD gaya kuchh hi salon mein donon ka josh

hangamon ko kar ke paida baiThe hain KHamosh

apna hi sab kiya dhara hai den ab kis ko dosh

'ishq ka ye anjam bhi hoga aata nahin yaqin

sar piTe ab uncle zahid aur KHala parwin

ek din bahbud-e-abaadi wale milne aae

thoDi der mein un bachchon ne kartab wo dikhlae

dil hi dil mein wo bechaare dekh ke phir ghabrae

ek hi ghar mein apne mahkame ki itni tauhin

sar piTe ab uncle zahid aur KHala parwin