wo aaen ghar pe mere mujhko etibar nahin

vo aa.eñ ghar pe mire mujh ko e'tibār nahīñ

ye merā ghar hai kisī piir kā mazār nahīñ

tirā marīz huuñ maiñ doctor kā ghar na batā

ye dard-e-ishq hai zālim koī buḳhār nahīñ

vo aaj suuñt ke nikle haiñ teġh-e-abrū ko

sitam hai saath koī ambulance-car nahīñ

ye ḳhaak piinā hai thoḌī sī pī ke leT rahe

jo pī ke thāne na pahuñchā vo mai-gusār nahīñ

milāo āñkhoñ se āñkheñ to jaan hāzir hai

ye naqd-bāzī kā saudā hai yaañ udhār nahīñ

vo jaam piite hī hotā hai ġham ġhalat apnā

sivā.e Tharre ke koī bhī ġham-gusār nahīñ

suneñge aap jo 'laq-laq' kī baat ḳhush hoñge

janāb-e-man vo middle paas hai gañvār nahīñ

wo aaen ghar pe mere mujh ko e'tibar nahin

ye mera ghar hai kisi pir ka mazar nahin

tera mariz hun main doctor ka ghar na bata

ye dard-e-ishq hai zalim koi buKHar nahin

wo aaj sunt ke nikle hain tegh-e-abru ko

sitam hai sath koi ambulance-car nahin

ye KHak pina hai thoDi si pi ke leT rahe

jo pi ke thane na pahuncha wo mai-gusar nahin

milao aankhon se aankhen to jaan hazir hai

ye naqd-bazi ka sauda hai yan udhaar nahin

wo jam pite hi hota hai gham ghalat apna

siwae Tharre ke koi bhi gham-gusar nahin

sunenge aap jo 'laq-laq' ki baat KHush honge

janab-e-man wo middle pas hai ganwar nahin