zan-murid shauhar ka shikwa

hai bajā halqa-e-izdivāj meñ mash.hūr huuñ maiñ

terā bairā tirā dhobī terā mazdūr huuñ maiñ

zan-murīdī kā sharaf pā ke bhī ranjūr huuñ maiñ

qissa-e-dard sunātā huuñ ki majbūr huuñ maiñ

merī madḳhdūma mire ġham kī hikāyat sun le

nāz-bardār se thoḌī sī shikāyat sun le

rishta-dāroñ ne tire jaan mirī khaa.ī hai

fauj kī fauj mire ghar meñ utar aa.ī hai

koī māmūñ koī ḳhālū hai koī bhaa.ī hai

baat kahne kī nahīñ tū bhī to harjā.ī hai

pālūñ bachchoñ ko tire yā tire ġham-ḳhvāroñ ko

in mamoloñ ko sambhālūñ ki chiḌī-māroñ ko

tū hī kah de ki tirā husn nikhārā kis ne

is black-out se mukhḌe ko sañvārā kis ne

ruḳh pe pherā tire surḳhī kā pachārā kis ne

tere make-up kā kiyā ḳharch gavāra kis ne

kaun tere liye darzī se ġharāra laayā

vāsta de ke ġharībī kā ḳhudā-rā laayā

phir bhī mujh se ye gila hai ki kamātā kam huuñ

naujavānī meñ tujhe aish karātā kam huuñ

le ke shopping ke liye tujh ko maiñ jaatā kam huuñ

aur 'plaza' meñ tujhe film dikhātā kam huuñ

kaash noToñ se hukūmat mirī jebeñ bhar de

mushkileñ shauhar-e-mazlūm kī āsāñ kar de

zachcha ban ban ke bajaT merā ghaTāyā tū ne

har na.e saal nayā gul hai khilāyā tū ne

apnā show-rōm mire ghar ko banāyā tū ne

jis meñ har rañg kā model hai sajāyā tū ne

us meñ holū bhī hai bholū bhī hai joshīlā bhī

us meñ zulfī bhī hai nanhā bhī rañgīlā bhī

kis qadar tujh pe garāñ sub.h kī bedārī hai

uTh ke chūlhe kī taraf jaanā tujhe bhārī hai

mujh se kab pyaar hai haañ niiñd tujhe pyārī hai

tū hī kah de yahī in.ām-e-vafādārī hai

maiñ vo shauhar huuñ ki ḳhud aag jalā.ī jis ne

lā ke bistar pe tujhe chaa.e pilā.ī jis ne

hañs ke bolūñ jo paḌosan se to jal jaatī hai

khaultī chaa.e kī mānind ubal jaatī hai

had-e-aḳhlāq se bāhar bhī nikal jaatī hai

mausam-e-pinDī kī mānind badal jaatī hai

jag to phir jag hai surāhī bhī na chhoḌī tū ne

jab laḌī mujh se to hāñDī bhī hai toḌī tū ne

kisī stage pe aa.uuñ to chamak jaatā huuñ

terī sarkār meñ pahuñchūñ to dubak jaatā huuñ

tū jo haule se bhī khāñse to ThiThak jaatā huuñ

ghuur ke dekhe to pīchhe ko sarak jaatā huuñ

phir bhī mujh se ye gilā hai ki vafādār nahīñ

tū hai bekār tire paas koī kaar nahīñ

hai baja halqa-e-izdiwaj mein mashhur hun main

tera baira tera dhobi tera mazdur hun main

zan-muridi ka sharaf pa ke bhi ranjur hun main

qissa-e-dard sunata hun ki majbur hun main

meri madKHduma mere gham ki hikayat sun le

naz-bardar se thoDi si shikayat sun le

rishta-daron ne tere jaan meri khai hai

fauj ki fauj mere ghar mein utar aai hai

koi mamun koi KHalu hai koi bhai hai

baat kahne ki nahin tu bhi to harjai hai

palun bachchon ko tere ya tere gham-KHwaron ko

in mamolon ko sambhaalun ki chiDi-maron ko

tu hi kah de ki tera husn nikhaara kis ne

is black-out se mukhDe ko sanwara kis ne

ruKH pe phera tere surKHi ka pachaara kis ne

tere make-up ka kiya KHarch gawara kis ne

kaun tere liye darzi se gharara laya

wasta de ke gharibi ka KHuda-ra laya

phir bhi mujh se ye gila hai ki kamata kam hun

naujawani mein tujhe aish karaata kam hun

le ke shopping ke liye tujh ko main jata kam hun

aur 'plaza' mein tujhe film dikhata kam hun

kash noTon se hukumat meri jeben bhar de

mushkilen shauhar-e-mazlum ki aasan kar de

zachcha ban ban ke bajaT mera ghaTaya tu ne

har nae sal naya gul hai khilaya tu ne

apna show-room mere ghar ko banaya tu ne

jis mein har rang ka model hai sajaya tu ne

us mein holu bhi hai bholu bhi hai joshila bhi

us mein zulfi bhi hai nanha bhi rangila bhi

kis qadar tujh pe garan subh ki bedari hai

uTh ke chulhe ki taraf jaana tujhe bhaari hai

mujh se kab pyar hai han nind tujhe pyari hai

tu hi kah de yahi inam-e-wafadari hai

main wo shauhar hun ki KHud aag jalai jis ne

la ke bistar pe tujhe chae pilai jis ne

hans ke bolun jo paDosan se to jal jati hai

khaulti chae ki manind ubal jati hai

had-e-aKHlaq se bahar bhi nikal jati hai

mausam-e-pinDi ki manind badal jati hai

jag to phir jag hai surahi bhi na chhoDi tu ne

jab laDi mujh se to hanDi bhi hai toDi tu ne

kisi stage pe aaun to chamak jata hun

teri sarkar mein pahunchun to dubak jata hun

tu jo haule se bhi khanse to ThiThak jata hun

ghur ke dekhe to pichhe ko sarak jata hun

phir bhi mujh se ye gila hai ki wafadar nahin

tu hai bekar tere pas koi kar nahin