aaj hamein betabi si hai sabr ki dil se ruKHsat thi

aaj hameñ betābi sī hai sabr kī dil se ruḳhsat thī

chāroñ or nigah karne meñ aalam aalam hasrat thī

kis mehnat se mohabbat kī thī kis ḳhvārī se yaarī kī

ranj hī saarī umr uThāyā kulfat thī yā ulfat thī

badnāmī kyā ishq kī kahiye rusvā.ī sī rusvā.ī hai

sahrā sahrā vahshat bhī thī duniyā duniyā tohmat thī

raah kī koī suntā na thā yaañ raste meñ mānind-e-jaras

shor sā karte jaate the ham baat kī kis ko tāqat thī

ahd hamārā terā hai ye jis meñ gum hai mehr-o-vafā

agle zamāne meñ to yahī logoñ kī rasm-o-ādat thī

ḳhālī haath siyah-rū aise kaahe ko the girya-kunāñ

jin rozoñ darvesh hue the paas hamāre daulat thī

jo uThtā hai yaañ se bagūlā ham sā hai āvāra koī

is vaadī meñ 'mīr' magar sar-gashta kisū kī turbat thī

aaj hamein betabi si hai sabr ki dil se ruKHsat thi

chaaron or nigah karne mein aalam aalam hasrat thi

kis mehnat se mohabbat ki thi kis KHwari se yari ki

ranj hi sari umr uThaya kulfat thi ya ulfat thi

badnami kya ishq ki kahiye ruswai si ruswai hai

sahra sahra wahshat bhi thi duniya duniya tohmat thi

rah ki koi sunta na tha yan raste mein manind-e-jaras

shor sa karte jate the hum baat ki kis ko taqat thi

ahd hamara tera hai ye jis mein gum hai mehr-o-wafa

agle zamane mein to yahi logon ki rasm-o-adat thi

KHali hath siyah-ru aise kahe ko the girya-kunan

jin rozon darwesh hue the pas hamare daulat thi

jo uThta hai yan se bagula hum sa hai aawara koi

is wadi mein 'mir' magar sar-gashta kisu ki turbat thi