aankhen laDa laDa kar kab tak laga rakhenge

āñkheñ laḌā laḌā kar kab tak lagā rakheñge

is parde hī meñ ḳhūbāñ ham ko sulā rakheñge

fikr-e-dahan meñ us kī kuchh ban na aa.ī āḳhir

ab ye ḳhayāl ham bhī dil se uThā rakheñge

musht-e-namak ko maiñ ne bekār kam rakhā hai

chhātī ke zaḳhm mere muddat maza rakheñge

sabzān-e-shahr aksar darpe haiñ aabrū ke

ab zahr paas apne ham bhī mañgā rakheñge

āñkhoñ meñ dilbaroñ kī mutlaq nahīñ muravvat

ye pās-e-āshnā.ī manzūr kyā rakheñge

jiite haiñ jab talak ham āñkheñ bhī laḌtiyāñ haiñ

dekheñ to jaur ḳhūbāñ kab tak ravā rakheñge

ab chāñd bhī lagā hai tere se jalve karne

shab-hā-e-māh chande tujh ko chhupā rakheñge

mizhgān o chashm-o-abrū sab haiñ sitam ke maa.il

in āfatoñ se dil ham kyūñkar bachā rakheñge

dīvān-e-'mīr' sāhab har ik kī hai baġhal meñ

do-chār sher un ke ham bhī likhā rakheñge

aankhen laDa laDa kar kab tak laga rakhenge

is parde hi mein KHuban hum ko sula rakhenge

fikr-e-dahan mein us ki kuchh ban na aai aaKHir

ab ye KHayal hum bhi dil se uTha rakhenge

musht-e-namak ko main ne bekar kam rakha hai

chhati ke zaKHm mere muddat maza rakhenge

sabzan-e-shahr aksar darpe hain aabru ke

ab zahr pas apne hum bhi manga rakhenge

aankhon mein dilbaron ki mutlaq nahin murawwat

ye pas-e-ashnai manzur kya rakhenge

jite hain jab talak hum aankhen bhi laDtiyan hain

dekhen to jaur KHuban kab tak rawa rakhenge

ab chand bhi laga hai tere se jalwe karne

shab-ha-e-mah chande tujh ko chhupa rakhenge

mizhgan o chashm-o-abru sab hain sitam ke mail

in aafaton se dil hum kyunkar bacha rakhenge

diwan-e-'mir' sahab har ek ki hai baghal mein

do-chaar sher un ke hum bhi likha rakhenge