ai saba gar shahr ke logon mein ho tera guzar

ai sabā gar shahr ke logoñ meñ ho terā guzār

kahiyo ham sahrā-navardoñ kā tamāmī hāl-e-zār

ḳhāk-e-dehlī se judā ham ko kiyā yak-bārgī

āsmāñ ko thī kudūrat so nikālā yuuñ ġhubār

mansab-e-bulbul ġhazal-ḳhvānī thā so to hai asiir

shā'irī zāġh-o-zaġhan kā kyoñ na hove ab shi'ār

tā.ir-e-ḳhush-zamzama kunj-e-qafas meñ hai ḳhamosh

chahchahe chahiyāñ kareñ haiñ sehn-e-gulshan meñ hazār

barg-e-gul se bhī kiyā na ek ne Tuk ham ko yaad

nāma-o-paiġhām-o-pursish be-marātib darkinār

be-ḳhalish kyūñkar na ho garm-e-suḳhan gulzār meñ

maiñ qafas meñ huuñ ki merā thā diloñ meñ ḳhaar ḳhaar

bulbul-e-ḳhush-lahja ke jaa.e pe go ġhauġhā.iyāñ

tarh ġhauġhā kī chaman meñ Dālīñ par kyā e'tibār

tā.irān-e-ḳhush-lab-o-lahja nahīñ rahte chhupe

shor se un ke bhare haiñ qarya-o-shahr-o-dayār

shahr ke kyā ek do kūchoñ meñ thī shohrat rahī

shahroñ shahroñ mulkoñ mulkoñ hai unhoñ kā ishtihār

kyā kahūñ sū-e-chaman hotā jo maiñ sargarm-e-gasht

phūl-gul jab khilne lagte josh-zan hotī bahār

shor sun sun kar ġhazal-ḳhvānī kā merī ham-safīr

ġhuncha ho aate jo hotā āb-o-rang-e-shāḳh-sār

ḳhush-navā.ī kā jinheñ dā'vā thā rah jaate ḳhamosh

jin ko maiñ kartā muḳhātab un ko hotā iftiḳhār

bā’zoñ ko rashk-e-qubūl-e-ḳhātir-o-lutf-e-suḳhan

bā’zoñ kā siina figār o bā’zoñ kā dil dāġh-dār

ekoñ ke hoñToñ ke uupar āfrīñ ustād thā

ek kahte the rusūḳh-e-dil hai apnā ustuvār

rabt kā dā'vā thā jin ko kahte the muḳhlis haiñ ham

jānte haiñ zāt-e-sāmī hī ko ham sab ḳhāksār

naql karte kyā ye sohbat mun’aqid jab hotī bazm

baiTh kar kahte the muñh par mere bā'ze bā'ze yaar

bandagī hai ḳhidmat-e-ālī meñ ham ko der se

kar rakhī hai jaan apnī ham ne hazrat par nisār

so na ḳhat un kā na koī parcha pahuñchā mujh talak

vāh-vā hai rābta rahmat hai ye iḳhlās-o-pyār

rafta rafta ho ga.iiñ āñkheñ mirī donoñ safed

bas-ki naame kā kiyā yāroñ ke maiñ ne intizār

likhte gar do harf lutf-āmez bā’d-az-chand-roz

to bhī hotā is dil-e-betāb-o-tāqat ko qarār

so to yak nanvishta kāġhaz bhī na aayā mere paas

un ham-āvāzoñ se jin kā maiñ kiyā rabt āshkār

ḳhat kitābat se ye kahte the na bhūleñge tujhe

āveñge ghar-bār kī tere ḳhabar ko baar baar

jab gayā maiñ yaad se tab kis kā ghar kaahe kā paas

āfrīñ sad-āfrīñ ai mardumān-e-rozgār

ab bayābāñ dar bayābāñ hai mirā shor-o-fuġhāñ

go chaman meñ ḳhush kī tum ne merī jā-e-nāla-vār

hai masal mash.hūr ye ‘umr-e-safar kotāh hai

tāle'-e-bargashta bhī karte haiñ ab imdād-e-kār

ik par-afshānī meñ bhī hai ye vatan gulzār sā

sāme'oñ kī chhātiyāñ nāloñ se hoveñgī figār

muñh pe āveñge suḳhan ālūda-e-ḳhūn-e-jigar

kyūñki yārān-e-zamāñ se chaak hai dil juuñ anaar

lab se le kar tā-suḳhan haiñ ḳhūñ-chakāñ shikve bhare

lek hai iz.hār har nā-kas se apnā nang-o-‘ār

chup bhalī go talḳh-kāmī khīñchnī is meñ paḌe

bait-bahsī tab’-e-nāzuk par hai apnī nāgavār

aaj se kuchh be-hisābī jaur-kun mardum nahīñ

in se ahl-e-dil sadā khīñche haiñ ranj-e-be-shumār

bas qalam rakh haath se jaane bhī de ye harf 'mīr'

kaah ke chāhe nahīñ kohsār hote be-vaqār

kaam ke jo log sāhib-fan haiñ so mahsūd haiñ

be-tahī karte raheñge hāsidān-e-nā-bakār

ai saba gar shahr ke logon mein ho tera guzar

kahiyo hum sahra-nawardon ka tamami haal-e-zar

KHak-e-dehli se juda hum ko kiya yak-bargi

aasman ko thi kudurat so nikala yun ghubar

mansab-e-bulbul ghazal-KHwani tha so to hai asir

sha'iri zagh-o-zaghan ka kyon na howe ab shi'ar

tair-e-KHush-zamzama kunj-e-qafas mein hai KHamosh

chahchahe chahiyan karen hain sehn-e-gulshan mein hazar

barg-e-gul se bhi kiya na ek ne Tuk hum ko yaad

nama-o-paigham-o-pursish be-maraatib darkinar

be-KHalish kyunkar na ho garm-e-suKHan gulzar mein

main qafas mein hun ki mera tha dilon mein KHar KHar

bulbul-e-KHush-lahja ke jae pe go ghaughaiyan

tarh ghaugha ki chaman mein Dalin par kya e'tibar

tairan-e-KHush-lab-o-lahja nahin rahte chhupe

shor se un ke bhare hain qarya-o-shahr-o-dayar

shahr ke kya ek do kuchon mein thi shohrat rahi

shahron shahron mulkon mulkon hai unhon ka ishtihaar

kya kahun su-e-chaman hota jo main sargarm-e-gasht

phul-gul jab khilne lagte josh-zan hoti bahaar

shor sun sun kar ghazal-KHwani ka meri ham-safir

ghuncha ho aate jo hota aab-o-rang-e-shaKH-sar

KHush-nawai ka jinhen da'wa tha rah jate KHamosh

jin ko main karta muKHatab un ko hota iftiKHar

ba’zon ko rashk-e-qubul-e-KHatir-o-lutf-e-suKHan

ba’zon ka sina figar o ba’zon ka dil dagh-dar

ekon ke honTon ke upar aafrin ustad tha

ek kahte the rusuKH-e-dil hai apna ustuwar

rabt ka da'wa tha jin ko kahte the muKHlis hain hum

jaante hain zat-e-sami hi ko hum sab KHaksar

naql karte kya ye sohbat mun’aqid jab hoti bazm

baiTh kar kahte the munh par mere ba'ze ba'ze yar

bandagi hai KHidmat-e-ali mein hum ko der se

kar rakhi hai jaan apni hum ne hazrat par nisar

so na KHat un ka na koi parcha pahuncha mujh talak

wah-wa hai rabta rahmat hai ye iKHlas-o-pyar

rafta rafta ho gain aankhen meri donon safed

bas-ki name ka kiya yaron ke main ne intizar

likhte gar do harf lutf-amez ba’d-az-chand-roz

to bhi hota is dil-e-betab-o-taqat ko qarar

so to yak nanwishta kaghaz bhi na aaya mere pas

un ham-awazon se jin ka main kiya rabt aashkar

KHat kitabat se ye kahte the na bhulenge tujhe

aawenge ghar-bar ki tere KHabar ko bar bar

jab gaya main yaad se tab kis ka ghar kahe ka pas

aafrin sad-afrin ai marduman-e-rozgar

ab bayaban dar bayaban hai mera shor-o-fughan

go chaman mein KHush ki tum ne meri ja-e-nala-war

hai masal mashhur ye ‘umr-e-safar kotah hai

tale'-e-bargashta bhi karte hain ab imdad-e-kar

ek par-afshani mein bhi hai ye watan gulzar sa

same'on ki chhatiyan nalon se howengi figar

munh pe aawenge suKHan aaluda-e-KHun-e-jigar

kyunki yaran-e-zaman se chaak hai dil jun anar

lab se le kar ta-suKHan hain KHun-chakan shikwe bhare

lek hai izhaar har na-kas se apna nang-o-‘ar

chup bhali go talKH-kaami khinchni is mein paDe

bait-bahsi tab’-e-nazuk par hai apni nagawar

aaj se kuchh be-hisabi jaur-kun mardum nahin

in se ahl-e-dil sada khinche hain ranj-e-be-shumar

bas qalam rakh hath se jaane bhi de ye harf 'mir'

kah ke chahe nahin kohsar hote be-waqar

kaam ke jo log sahib-fan hain so mahsud hain

be-tahi karte rahenge hasidan-e-na-bakar