ai tu ki yan se aaqibat-e-kar jaega

ai tū ki yaañ se āqibat-e-kār jā.egā

ġhāfil na rah ki qāfila ik baar jā.egā

mauqūf hashr par hai so aate bhī ve nahīñ

kab darmiyāñ se vāda-e-dīdār jā.egā

chhūTā jo maiñ qafas se to sab ne mujhe kahā

bechāra kyūñke tā sar-e-dīvār jā.egā

degī na chain lazzat-e-zaḳhm us shikār ko

jo khā ke tere haath kī talvār jā.egā

āvegī ik balā tire sar sun le ai sabā

zulf-e-siyah kā us kī agar taar jā.egā

bāhar na aatā chaah se yūsuf jo jāntā

le kārvāñ mire ta.iiñ bāzār jā.egā

tadbīr mere ishq kī kyā fā.eda tabīb

ab jaan hī ke saath ye āzār jā.egā

aa.e bin us ke haal huā jaa.e hai taġhīr

kyā haal hogā paas se jab yaar jā.egā

kūche ke us ke rahne se baaz aa vagarna 'mīr'

ik din tujhe vo jaan se bhī maar jā.egā

ai tu ki yan se aaqibat-e-kar jaega

ghafil na rah ki qafila ek bar jaega

mauquf hashr par hai so aate bhi we nahin

kab darmiyan se wada-e-didar jaega

chhuTa jo main qafas se to sab ne mujhe kaha

bechaara kyunke ta sar-e-diwar jaega

degi na chain lazzat-e-zaKHm us shikar ko

jo kha ke tere hath ki talwar jaega

aawegi ek bala tere sar sun le ai saba

zulf-e-siyah ka us ki agar tar jaega

bahar na aata chah se yusuf jo jaanta

le karwan mere tain bazar jaega

tadbir mere ishq ki kya faeda tabib

ab jaan hi ke sath ye aazar jaega

aae bin us ke haal hua jae hai taghir

kya haal hoga pas se jab yar jaega

kuche ke us ke rahne se baz aa wagarna 'mir'

ek din tujhe wo jaan se bhi mar jaega