bahut hi apne tain hum to KHwar pate hain

bahut hī apne ta.iiñ ham to ḳhvār paate haiñ

vo koī aur haiñ jo e.atibār paate haiñ

tirī galī meñ maiñ royā thā dil-jalā yak shab

hanūz vaañ se dil-e-dāġh-dār paate haiñ

na hoveñ shefta kyoñ iztirāb par āshiq

ki jī ko kho ke dil-e-be-qarār paate haiñ

gila abas hai tirī āstāna-bosī kā

masīh-o-ḳhizr bhī vaañ kam hī baar paate haiñ

qaaf

taḌap hai qais ke dil meñ tah-e-zamīñ is se

ġhazāl-e-dasht nishān-e-mazār paate haiñ

vagarna ḳhaak hue kitne hī mohabbat meñ

kisī kā bhī kahīñ musht-e-ġhubār paate haiñ

shitābī aave ajal 'mīr' jaave ye ronā

ki mere shor se tasdī' yaar paate haiñ

bahut hi apne tain hum to KHwar pate hain

wo koi aur hain jo eatibar pate hain

teri gali mein main roya tha dil-jala yak shab

hanuz wan se dil-e-dagh-dar pate hain

na howen shefta kyon iztirab par aashiq

ki ji ko kho ke dil-e-be-qarar pate hain

gila abas hai teri aastana-bosi ka

masih-o-KHizr bhi wan kam hi bar pate hain

qaf

taDap hai qais ke dil mein tah-e-zamin is se

ghazal-e-dasht nishan-e-mazar pate hain

wagarna KHak hue kitne hi mohabbat mein

kisi ka bhi kahin musht-e-ghubar pate hain

shitabi aawe ajal 'mir' jawe ye rona

ki mere shor se tasdi' yar pate hain